«Մանչեսթեր Յունայթեդին» կրկին չհաջողվեց հաղթել «Հալ Սիթիին». Ժոզե Մոուրինյոյի գլխավորած թիմը երրորդ անընդմեջ ոչ-ոքին խաղաց Պրեմիեր լիգայում: Ընթացիկ առաջնությունում «Յունայթեդն» արդեն 9 հանդիպում ոչ-ոքի է ավարտել: Հունվարի 26-ին Անգլիայի լիգայի գավաթի խաղարկության կիսաեզրափակչի պատասխան խաղում «Մանչեսթերը» 2:1 հաշվով զիջել էր «Հալին», և բոլորը սպասում էին, որ ԱՊԼ-ի 23-րդ տուրում հեղինակավոր ակումբը սեփական հարկի տակ ռևանշի կհասնի: Գոլազուրկ ոչ-ոքին հիասթափեցրեց «Յունայթեդի» երկրպագուներին:
Արդեն իսկ լուրջ քննարկման առարկա է դարձել Հենրիխ Մխիթարյանի ոչ այնքան տպավորիչ խաղը: Փորձենք հասկանալ գրանցված արդյունքի սուբյեկտիվ և օբյեկտիվ պատճառները: Հյուրերը, որոնք խաղում էին 5-3-2 խաղային սխեմայով, ողջ հանդիպման ընթացքում կիրառեցին պրեսինգ՝ ազատ տարածություններ չտալով մրցակցին: Բացի հինգ պաշտպաններից՝ պաշտպանողական գործողություններին մասնակցում էին նաև կիսապաշտպանները: «Մանչեսթեր Յունայթեդը», որը խաղաց 4-2-3-1 սխեմայով, հանդիպման սկզբում փորձում էր երկար փոխանցումներով մոտենալ մրցակցի տուգանային հրապարակին: Երբ կարգով ավելի թույլ թիմը անցնում է խուլ պաշտպանության, հաջողության հասնելու հիմնական գրավականը դառնում է ֆուտբոլիստների անհատական վարպետությունը, ստանդարտ դիրքերը, քանզի կարճ փոխանցումներով կամ կոմբինացիաներով դժվար է ճեղքել երկշերտ պաշտպանությունը:
«Հալի» հետ հանդիպումը այն բացառիկ առիթներից մեկն էր, որտեղ Մոուրինյոն պետք է օգտագործեր Ֆելաինիին, ով երկրորդ հարկում հաջող է խաղում: Իբրահիմովիչը, ով միակ նոմինալ հարձակվողն էր, ի զորու չէ պայքարել երկրորդ հարկում, գնդակ պահել և եզրափակել գրոհները: Ֆելաինիի դաշտում գտնվելու դեպքում տուգանային հրապարակ բարձրից եկող փոխանցումների ժամանակ Իբրահիմովիչը հնարավորություն կունենար տեղաշարժվելու, մոտենալու մրցակցի դարպասին, ինչը մեծ լարվածություն կստեղծեր: Պաշտպանների համար շատ դժվար է պայքարել կամ ֆուտբոլային լեզվով ասած՝ փակել երկու բարձրահասակ ֆուտբոլիստների, ովքեր կարող են անմիջապես հարվածել դարպասին կամ փոխանցում կատարել: Որքան էլ տարօրինակ է, Ֆելաինին նույնիսկ հայտավորված չէր այս խաղին:
Երեք միավոր «պոկելու» համար Մոուրինյոն Մխիթարյանի փոխարեն խաղադաշտ դուրս բերեց Մատային՝ հույս ունենալով, որ վերջինս կկարողանա գնդակ պահել և կատարել գոլային փոխանցումներ: Այս մտահղացումը ևս ձախողվեց, քանզի վերջին 20-25 րոպեներին «Յունայթեդի» գրոհները հախուռն բնույթ էին կրում:
Երկրորդ կեսի սկզբից մրցակցի խիտ դասավորության հետևանքով Հենրիխ Մխիթարյանի համար բավական դժվար էր օգտագործել իր բարձր արագությունը: Այս խաղից ընդամենը 3 օր առաջ մեր ֆուտբոլիստը փայլուն հանդիպում էր անցկացրել «Ռեդինիգի» դեմ: Ժամանակակից ֆուտբոլում և հատկապես Անգլիայում չափազանց դժվար է երեք օրվա ընթացքում երկու լիարժեք հանդիպում անցկացնելը: «Ռեդինիգի» հետ ամբողջ հանդիպմանը մասնակցած ֆուտբոլիստներից միայն Մխիթարյանը և պաշտպան Ռոխոն էին տեղ գտել «Հալի» հետ խաղի մեկնարկային կազմում: Հնարավոր է, որ Ֆելաինիի հայտացուցակից բացակայելը ֆունկցիոնալ առումով նրա անպատրաստ լինելն էր:
Ըստ էության, Մխիթարյանի հարցում Մոուրինյոն գնաց չարդարացված վաբանկի: Օբյեկտիվ մոտենալով Մխիթարյանի խաղին՝ պետք է ասել, որ առաջին խաղակեսում նա իր բարձրության վրա էր: Երկրորդ կեսում զգացնել տվեց հոգնածությունը, ինչը բնական էր: Կարծում ենք՝ եթե Մոուրինյոն Մխիթարյանին ասպարեզ դուրս բերեր հանդիպման վերջին 20-25 րոպեներին, ապա մրցակցի խաղացողների հոգնածության ֆոնին հայ կիսապաշտպանը կկարողանար տպավորիչ և արդյունավետ խաղ ցուցադրել: Ամեն դեպքում ուրախալի է, որ Մոուրինյոն կարևորագույն պահերին վստահում է Մխիթարյանին:
Ինչևէ, «Մանչեսթեր Յունայթեդի» երեք միավոր չվաստակելու օբյեկտիվ պատճառ կարելի է համարել խիտ խաղացանկը: Մասնավորապես, «Յունայթեդը» այսօր Անգլիայում միակ ակումբն է, որ մասնակցում է միանգամից չորս մրցաշարարի՝ Պրեմիեր լիգա, Անգլիայի գավաթ, Անգլիայի լիգայի գավաթ և Եվրոպա լիգա: Թեև Մոուրինյոն բազմաթիվ փորձարկումներ է կատարում, այդուհանդերձ, այս պահին «Մանչեսթերը» չունի երկու հավասարազոր կազմ, որպեսզի նման հաճախականությամբ հանդիպումներում կարողանա հաղթել: Բնական է, ֆիզիկական առումով շատ ֆուտբոլիստներ ուղղակի չեն դիմանում, հետևաբար գրանցված ոչ-ոքին ինչ-որ տեղ նորմալ արդյունք էր:
