Ստեփան Դեմիրճյանի ղեկավարած Հայաստանի ժողովրդական կուսակցությունը առաջիկա խորհրդարանական ընտրություններին ՀԱԿ-ի հետ դաշինքով մասնակցելու վերջնական որոշում դեռ չունի։ Այս մասին «Առաջին լրատվական»-ի հետ զրույցում ասաց կուսակցոթյան փոխնախագահ Գրիգոր Հարությունյանը։
«Մենք բազմիցս ասել ենք, որ դաշինքային հարաբերություններ ունենք Հայ ազգային կոնգրես կուսակցության հետ, այդ հարաբերությունները շարունակվում են։ Որոշում ինչպե՞ս են կայացնում՝ հավաքվում ենք վարչությունով որոշում, որ միանում ենք. դա դեռ չի եղել»,- ասաց Հարությունյանը՝ հավելելով, որ ակտիվ բանակցությունների մեջ են, և իրենց «համար առաջին դաշնակիցը Հայ ազգային կոնգրեսն է»։
Հետաքրքրվեցինք՝ ե՞րբ կլինի կուսակցության վերջնական որոշումն ու պաշտոնական հայտարարությունը: «Ժամանակին»,- արձագանքեց Հարությունյանը։
Հարցին, թե ՀԺԿ-ն արդյոք կիսո՞ւմ է Հայ ազգային կոնգրեսի մոտեցումը Ղարաբաղյան հակամարտության կարգավորման հարցում, Գրիգոր Հարությունյանը պատասխանեց. «Մեր մոտեցումը հետևյալն է՝ Ղարաբաղի անվտանգություն, կարգավիճակ, պատվաբեր խաղաղություն։ Սա է մեր մոտեցումը, կարծում եմ՝ դա ողջ ժողովրդի մոտեցումն է»․
Դիտարկմանը, թե ՀԱԿ-ի համագումարում հնչած Լևոն Տեր-Պետրոսյանի ելույթի հետ համակարծի՞ք եք, որը հակամարտության կարգավորման փուլային տարբերակին էր նվիրված, Գրիգոր Հարությունյանն արձագանքեց. «Փուլային տարբերակը Լևոն Տեր-Պետրոսյանի տարբերակը չէ, դա Ռոբերտ Քոչարյանի և Սերժ Սարգսյանի տարբերակն է։ Լևոն Տեր-Պետրոսյանն ասում է այն, ինչ ես քիչ առաջ նշեցի»։
Այսինքն՝ Ղարաբաղի հարցում կիսո՞ւմ եք ՀԱԿ-ի մոտեցումը՝ հստակեցմանն ի պատասխան մեր զրուցակիցն արձագանքեց. «Ես մեր մոտեցումն արդեն ասացի»։
