Շախմատի աշխարհի 13-րդ չեմպիոն, ակտիվիստ Գարի Կասպարովը Նյու Յորքում հարցազրույց է տվել Le Figaro ֆրանսիական պարբերականին։ Նրա կարծիքով՝ Ռուսաստանի նախագահ Վլադիմիր Պուտինը անվստահություն է տածում ԱՄՆ նախագահ Դոնալդ Թրամփի նկատմամբ, բայց նա հույս ունի ապակայունացնել Ֆրանսիան և Գերմանիան ընտրությունների շեմին։
Լրագրողի հարցին, թե Արևմուտքը ի՞նչ սպառնալիքների կարող է բախվել 2017 թվականին, Կասպարովը նշել է, որ այս տարի պատմական է լինելու, անցումային, ինչպիսին եղել է 1917 թվականը։ «Այս տարի լրանում է Ռուսաստանում բոլշևիկների կողմից իշխանությունը զավթելու 100 տարին։ Ֆրանսիայում և Գերմանիայում վճռական ընտրություններ են լինելու։ Կանցլեր Անգելա Մերկելի դեմ սպասվում են նենգ հարձակումներ։ Ռուսական հատուկ ծառայությունները փորձում են վարկաբեկել նրան և դրա համար մոբիլիզացնոմ են բոլոր ռեսուրսները։ Կիբերհարձակումներն ավելի մասշտաբային կլինեն, քան ԱՄՆ-ում տեղի ունեցած հարձակումները»,- ասել է Կասպարովը։
Անդրադառնալով ԱՄՆ-ի նախագահական ընտրություններին Ռուսաստանի միջամտությանը՝ Կասպարովն ասել է, որ խնդիրն իրականում ոչ թե ՌԴ-ն է, այլ Պուտինը։ «Այո, նա չէր կանխատեսել Թրամփի հաղթանակ։ Սկզբում Պուտինը նրան վերաբերվում էր ծաղրածուի նման։ Երբ Թրամփը սկսեց առաջ շարժվել, Պուտինը դեռ կարծում էր, թե նա կպարտվի, քանի որ Թրամփի ճամբարում շարունակ պնդում էին, որ ընտրությունները կեղծված են»,- ասել է Կասպարովը։
Նրա խոսքով՝ Պուտինը ԿԳԲ-ի «ծնունդ է», նա միշտ նախընտրում է գաղտնի գործողությունները, քան կենտրոնացված ռմբակոծությունները։ Նրա համար ավելի լավ է շանտաժի ենթարկել մարդկանց, քան սպանել նրանց, դա նրա արյան մեջ է։ Պուտինի միակ ռազմավարությունը քաղաքական գոյատևումն է։
«Այսպիսով, նա ընտրություն կատարեց հօգուտ Սիրիայի՞»,- հստակեցրել է լրագրողը։
«Այո, դա հանճարեղ քայլ էր. նա գիտեր, որ Դամասկոս ներխուժումը կհանգեցնի հետևանքների Եվրոպայի տարածքում՝ մեծացնելով փախստականների հոսքը։ Մի հարվածով նա երկու նապաստակ սպանեց, նույնիսկ երեք. նա մարտահրավեր նետեց Ամերիկային՝ ցուցադրելով Օբամայի թուլությունը, միևնույն ժամանակ օգնելով սիրիացի և իրանցի դաշնակիցներին»,- պատասխանել է Կասպարովը։
Նա նաև ընդգծել է, որ Սիրիայում Պուտինի թիրախը ԴԱԻՇ-ի ահաբեկիչները չեն, քանի որ ռուսական ավիահարվածների միայն 10 տոկոսն է ուղղված ջիհադիստների դեմ, իսկ մնացած 90 տոկոսը խոցում է Բաշար Ալ-Ասադի ռեժիմի ընդդիմության դիրքերը։ Եվրոպայում գոյություն ունի գաղափարախոսական կոռուպցիա Պուտինի նկատմամբ, ըստ որի՝ պետք է նրա հետ պայմանավորվածություն ձեռք բերել, քանի որ Ռուսաստանը «չի կարող անտեսվել»՝ հավելել է Կասպարովը։
Անդրադառնալով Պուտինի և Թրամփի վարչակազմի համագործակցությանը՝ նա նշել է, որ ռուս առաջնորդը սպասողական դիրքում է, քանի որ շատ անորոշություններ կան։
«Բացի այդ, նա գիտի, որ Թրամփը հազիվ թե փոխի իր վերաբերմունքը… Ներկայում Պուտինի խնդիրը եվրոպական միասնական ճակատն է։ Ինչ վերաբերում է Թրամփին, ապա բացահայտվել են նոր փաստեր Մոսկվայի հետ նրա կապերի վերաբերյալ։ Նա զգալի դրամական փոխանցումներ է ստացել Ռուսաստանից 2008-2009թթ., իսկ այդ ներդրումը փրկել է նրան սնանկացումից։ Ինչո՞ւ է նա հրաժարվում հրապարակել իր հարկային հայտարարագիրը։ Ի՞նչ գումարներ է նա ստացել արտասահմանյան ռեժիմներից, որոնք երբեմն բացահայտ թշնամական վերաբերմունք են դրսևորում ԱՄՆ-ի հանդեպ։ Նա պետք է պատասխանի այս բոլոր հարցերին»,- ասել է Կասպարովը։
