«Առաջին լրատվական»-ի զրուցակիցն է ՌԱԿ ատենապետ Հակոբ Ավետիքյանը:
-Պարոն Ավետիքյան, ըստ մամուլի հրապարակումների՝ ՍԴՀԿ-ն և ՌԱԿ-ը հնարավոր է՝ միանան Գագիկ Ծառուկյանի կողմից ձևավորվող լայն դաշինքին: Որևէ որոշում արդեն ունե՞ք կայացրած մասնակցության ձևաչափի հետ կապված:
-Ո՛չ ձևաչափի և ո՛չ էլ որևէ դաշինքի միանալու վերաբերյալ մենք որևէ որոշում չունենք: Մեր վարչության նիստը տեղի կունենա ուրբաթ՝ ժամը 17:00:
Մինչ այդ, այս օրերին մեր շփումները տարբեր դաշիքների և կազմակերպությունների հետ ընթանում են շատ ակտիվ, բայց, դեռևս, որոշում չունենք, քանի որ բավականին հաշվարկելու, համեմատելու խնդիր կա, նաև պարզելու, թե այս կամ այն դաշինքին միանալու նախապայմաններն ինչ են ենթադրում: Հետևաբար կարող եմ ասել հետևյալը՝ իհարկե, մենք պետք է միանանք դաշինքներից մեկին:
-Այսինքն՝ միանալն անխուսափելի է:
-Այո, ներկա պայմաններում շատ դժվար է առանձին գնալ առաջ:
-Պարոն Ավետիքյան, եթե որոշեք միանալ Գագիկ Ծառուկյանի դաշինքին՝ ի՞նչը կարող է միավորիչ հանգամանք լինել: Գաղափարական առումով ակնհայտ է, որ չի լինի այդ միասնությունը: Զուտ միանալու եք՝ երկրում փոփոխությունների, իշխանափոխությա՞ն հասնելու:
-Ես շատ անկեղծ ասեմ՝ այս դաշինքների կազմավորման մեջ ես չեմ տեսնում անգամ, որևիցե, գաղափարական ընդհանուր գծեր: Ընդհանուր քաղաքական կեցվածք ունեն դաշինքները, որն է՝ իշխանություններին հակակշիռ լինել, մյուսը ուզում է իշխանափոխություն, իշխանության ներսում փոխել ընդհանուր դրվածքը և ներքին, արտաքին քաղաքականությունը և այլն: Հետևաբար, յուրաքանչյուր քաղաքական կազմակերպություն աշխատում է ինչքան հնարավոր է շատ թվով մարդկանցով խցկվել ապագա խորհրդարան: Գուցե տգեղ կամ կոպիտ է հնչում, բայց սա է իրականությունը:
-Չի՞ ստացվում այնպես, որ դրանք կարճաժամկետ դաշինքներ են և երկար կյանք չեն ունենա, քանի որ գաղափարական չեն միավորումները:
-Հիմա քանի որ ոչ ոք այդ մասին չի մտածում, բայց լրագրողներս ստիպված ենք տեսնել, կռահել, գուշակել կատարվելիքը, այո՛, ձեզ հետ համաձայն եմ: Քանի որ դաշինքների քաղաքական գաղափարախոսական հենքը ուժեղ չէ, այդ պարագայում հետագայում բավականին բարդություններ կառաջանան և պառակտում չասեմ, բայց կազմալուծված դաշինքներ կարող ենք ունենալ, ավելի շուտ ոչ թե դաշինքներ, այլ խորհրդարանական խմբակցությունների ներքին պառակտումներ, որը սրանից առաջ էլ կար, սա արտառոց երևույթ չէ մեր քաղաքական իրականության համար:
-Պարոն Ավետիքյան, ըստ էության, եթե «Ելք»-ի հետ չստացվեց դաշինք կազմել՝ մնում է «Համախմբում»-ը՝ օհանյանական-օսկանյանական թևը և Գ. Ծառուկյանը, այս երկուսից որի՞ հետ եք դաշինք կազմելու:
-Ես գիտեմ, որ այլ դաշինքներ ևս կազմավորման ընթացքի մեջ են, և չպետք է բացառել ոչ մեկին միանալը: Իհարկե, տեսնում ենք, սակայն դաշինքների մեջ նախկին համակրանքի խնդիրն էլ չկա, այսինքն՝ համակրանքով էլ իրար չեն միանում, պարզապես արևի տակ տեղ ունենալու մարմաջով:
-Պարոն Ավետիքյան, եթե Ծառուկյան դաշինքին միանա ՌԱԿ-ը, ստացվո՞ւմ է, որ Գագիկ Ծառուկյան քաղաքական գործիչ Դուք ճանաչում եք, արձանագրում եք, թե՞ սրանք ուղղակի քայլեր են:
–Գագիկ Ծառուկյանը, ամեն պարագայում, ճիշտ է, համակրանք է վայելում որոշակի զանգվածների մոտ, բայց նաև ցույց է տվել, որ ինքը կարողանում է իր բավական մարդաշատ խմբակցություններն ապահովել, և այս առումով նա ապացուցել է այդ ամբողջը: Հետևաբար արժանի է, որ մենք լուրջ մոտենանք այդ քաղաքական անձնավորությանը և նկատի ունենանք իր հնարավորությունները:
-Բայց հանրապետականը ցույց տվեց, թե ինչպես կարող է վարվել նրա հետ, երբ իրական այլընտրանք ներկայացնի․ հիշենք վիրավորանքները, որ երկու տարի առաջ հասցրեցին նրան:
-Այո, բայց հիմա՞… Քաղաքական կյանքը փոփոխական է, կարող է հետագայում նույնը կրկնվել, չես կարող հիմա ինչ-որ կռահումներ անել, բայց չի բացառվում նման բան:
-Պարոն Ավետիքյան, Դուք ՍԴՀԿ-ի հետ միասի՞ն եք մասնակցելու ընտրություններին:
-ՍԴՀԿ-ի հետ մենք ամենասերտ հարաբերությունների մեջ ենք և աշխատում ենք մեր քայլերը կոորդինացնել այդ կուսակցության հետ: ՍԴՀԿ-ն՝ Հնչակյան կուսակցությունը կամ մենք գաղափարականորեն տարբեր ենք, մեր գաղափարախոսությունը լիբերալ-դեմոկրատական է, նրանցը՝ սոցիալ-դեմոկրատական, և այստեղ բավական մեծ տարբերություն կա: Սակայն մեզ միավորող ասպեկտներն էլ շատ են, որոնցից մեկը մեր տարիների համագործակցությունն է եղել Սփյուռքում, և նաև երկուսն էլ՝ թե՛ ՍԴՀԿ-ն, թե՛ ՌԱԿ-ը ցանցային կուսակցություններ են, այսինքն՝ համահայկական կազմակերպություն են, այստեղ էլ նմանություններ կան, նաև մենք վարժված ենք հնչակյանների հետ, հատկապես, Մերձավոր Արևելքի շրջանում համագործակցել, և դրանում ոչ մի տարօրինակ բան չկա, ընդհակառակը՝ մենք ամենասերտ հարաբերությունների մեջ ենք և աշխատում ենք մեր քայլերը կոորդինացնել:
