Ամերիկացի երգչուհի Մադոննային պետք է ձերբակալել «Սպիտակ տան պայթեցման» մասին նրա հայտարարություններից հետո՝ կարծում է ԱՄՆ նախագահ Դոնալդ Թրամփի անցումային թիմի անդամ, Ներկայացուցիչների պալատի նախկին խոսնակ, հանրապետական Նյուտ Գինգրիչը՝ փոխանցում է Huffington Post-ը։
Մադոննան ելույթ էր ունեցել Վաշինգտոնում զանգվածային բողոքի ակցիայի ժամանակ։ Ելույթի ընթացքում նա երկու անգամ անպատշաճ էր արտահայտվել Թրամփի հասցեին։ Մադոննան հավելել էր, որ «շատ է մտածել Սպիտակ տունը պայթեցնելու մասին»։ «Սակայն ես գիտեմ, դա ոչինչ չի փոխի»,-հավելել էր նա։
«Սա նոր ձախ ֆաշիզմ է։ Նա դրա մասնիկն է, ես կարծում եմ՝ մենք պետք է պատրաստվենք ինքնապաշտպանության. նրան պետք է ձերբակալել»,-Թրամփի թիմակցի խոսքերն է մեջբերում պարբերականը։ Գինգրիչը նման հայտարարությամբ է հանդես եկել Fox & Friends հեռուստահաղորդման ժամանակ։
Ավելի ուշ երգչուհին հայտարարել է, որ հայտարարությունը փոխաբերական իմաստ է ունեցել։ «Ես հակված չեմ բռնության»,-գրել է նա իր Instagram-ում։