Sputnik լրատվական գործակալության փոխանցմամբ՝ Վրաստանի նախկին վարչապետ Վանո Մերաբիշվիլին այլևս չի հանդիսանում նախկինում իշխող «Միացյալ ազգային շարժում» (ՄԱՇ) կուսակցության գլխավոր քարտուղար։
Այդ մասին հայտարարել է կուսակցության առաջնորդներից Նիկա Մելիան, ով դրանից առաջ թբիլիսյան թիվ 9 բանտում հանդիպել է Մերաբիշվիլու հետ։
Այն բանից հետո, ինչ ՄԱՇ-ի քաղաքական գլխավոր ֆիգուրների մեծ մասը լքեց կուսակցությունը, նախորդ շաբաթ տեղի ունեցավ կուսակցության համագումարը, որի ժամանակ մասնակի ընտրվեց քաղաքական խորհուրդ, ինչպես նաև նախագահ ու նրա տեղակալներ։
Անփոփոխ էր մնացել միայն ՄԱՇ-ի գլխավոր քարտուղար Մերաբիշվիլու պաշտոնը։ Սակայն դրանից անմիջապես անց նրա Facebook-յան էջում հրապարակվել է գրառում, որի համաձայն՝ նա հերքել է, թե տվել է իր համաձայնությունը կուսակցության գլխավոր քարտուղարի պաշտոնի համար։
Մելիան լրագրողների հետ զրույցում հայտարարել է, որ այդ հարցում Վանո Մերաբիշվիլու դիրքորոշումը մնում է անփոփոխ և որ նա չի մնում ՄԱՇ-ի գլխավոր քարտուղարի պաշտոնում։