«Բացառվում է, որ Ստեփան Դեմիրճյանը, ոչ էլ ՀԺԿ-ից որեւէ մեկը ընդգրկվեն որեւէ այլ կուսակցության համամասնական ցուցակում»,- «Առաջին լրատվական»-ի հետ զրույցում մեկնաբանելով լուրերը՝ թե ՀԺԿ առաջնորդ Ստեփան Դեմիրճյանը ընդգրկվել է ԲՀԿ համամասնական ցուցակում, ասաց ՀԺԿ փոխնախագահ Գրիգոր Հարությունյանը։ Մեր դիտարկմանը՝ թե համագործակցությունը բացառված է նաև դաշինքի՞ դեպքում, Հարությունյանը արձագաքեց. «Եթե դաշինք կազմվեց, բնականաբար դաշինքնի կազմում կլինենք, իսկ թե ո՞ր դաշինքը, ո՞ւմ հետ, ե՞րբ՝ պարզ կլինի մինչև այս ամսվա վերջ»։
Հարությունյանն ասաց, որ այս պահին բանակցությունների մեջ են։ Մշտապես բանակցում են իրենց դաշինքային գործընկեր՝ ՀԱԿ-ի հետ, սակայն հերքեց մամուլի այն հրապարակումները, թե ՀԱԿ-ում Դեմիրճյանին անցողիկ հորիզոնական չեն առաջարկում։ Չկա նման բան, դրանք սուտ լուրեր են։ Մենք մշտապես բանակցում ենք մեր գործընկերոջ հետ։ Այո, հանդիպել են նաև Ստեփան Դեմիրճյանն ու Գագիկ Ծառուկյանը։ Հանդիպում ունեցել են, բայց որեւէ որոշում չի կայացվել»,- ասաց Հարությունյանը։
Ընտրություններին մասնակցելու ՀԺԿ ձևաչափը քննարկվել է նաև ՀԺԿ օրերս կայացած համագումարին, որի ժամանակ կուսակիցների գերակշիռ մասի կարծիքը եղել է այն, որ ընտրություններին պետք է մասնակցել լայն դաշինքային սկզբունքով, որպեսզի հնարավոր լինի պայքարել իշխանական մեքենայի դեմ։
Մեր հարցին, թե Մարտի մեկի ոճրագործությունը խոչընդոտ չէ՞ ՀԺԿ-ի համար, որպեսզի համագործակցեն մի դաշինքի հետ, որի կազմում ընդգրկված են Սեյրան Օհանյանը, Վարդան Օսկանյանը, Գագիկ Ծառուկյանը, որի թիկնազորը, ըստ փաստահավաք խմբի զեկույցի՝ ակտիվ մասնակցություն է ունեցել Մարտի 1-ի գործողություններին, Գ. Հարությունյանը նկատեց. «Եկեք ոչինչ չանձնավորենք։ Քաղաքականության մեջ ոչինչ պետք չէ բացառել։ Մենք կողմնակից ենք լայն դաշինքային համագործակցության։ Տարբեր մոտեցումներ կան։ Եթե մենք ուզում ենք երկրում ինչ որ բան փոխել, ապա հարցին պետք է այլ կերպ մոտենալ»,- եզրափակեց մեր զրուցակիցը։
