Այն բանից հետո, ինչ «Բարգավաճ Հայաստան» կուսակցության նախկին առաջնորդ Գագիկ Ծառուկյանը հայտարարել է քաղաքականություն վերադառնալու, առաջիկա խորհրդարանական ընտրություններին լայն դաշինքով մասնակցելու մասին՝ մի շարք քաղաքական ուժեր, որոնք նախկինում գործակցում էին Ծառուկյանի հետ «եռյակի» ձևաչափում, պատրաստակամություն հայտնեցին կրկին համագործակցել։
Այդ ուժերից մեկը Ազգային ժողովի պատգամավոր Լյուդմիլա Սարգսյանի ղեկավարած Վերակազմյալ սոցիալ-դեմոկրատ հնչակյան կուսակցությունն է։ Սարգսյանն օրերս մեզ հետ զրույցում հայտարարել էր, որ անձամբ կնախաձեռնի Ծառուկյանի հետ հանդիպում, որի ընթացքում կքննարկեն ընտրություններին դաշինքով մասնակցելու հարցը։
«Առաջին լրատվական»-ին հայտնի է դարձել, որ առաջիկա օրերին «Ծառուկյան» դաշինքին միանալու հայտարարությամբ է հանդես գալու նաև Սոցիալ-դեմոկրատ հնչակյան կուսակցությունը, որը տիկին Սարգսյանի ղեկավարած կուսակցության հետ, մեղմ ասած, ոչ բարեկամական հարաբերություններ ունի։
Ոչ վաղ անցյալում մամուլը պարբերաբար անդրադառնում էր այս երկու կուսակցությունների ներկայացուցիչների բանավեճերին, որոնք հաճախ անցնում էին կոռեկտության սահմանը։
Լյուդմիլա Սարգսյանը «Առաջին լրատվական»-ին փոխանցեց, որ առայժմ Գագիկ Ծառուկյանի հետ չի հանդիպել, սակայն կարծում է, որ Ծառուկյանը կարող է ռեալ այլընտրանք դառնալ գործող իշխանություններին։
Ինչ վերաբերում է ՍԴՀԿ-ի հետ նույն դաշինքում լինելուն, Սարգսյանն ասաց, որ դրանք առայժմ միայն լուրերի մակարդակում են։ Հարցին՝ արդյոք ինքը քննարկման ընթացքում այս հարցը կբարձրացնի՞ և, դրանից ելնելով, կվերանայի՞ իր որոշումը, Սարգսյանն արձագանքեց. «Ես նման խնդիր չեմ դրել և չեմ կարծում, թե դրա անհրաժեշտությունը կա»։
Լյուդմիլա Սարգսյանը հավելեց, որ եթե ամբողջ ընդդիմադիր դաշտը միավորվի մեկ դաշինքի շուրջ՝ այդ թվում Սեյրան Օհանյանը, Վարդան Օսկանյանը, իշխանությունը վերարտադրվելու որևէ հնարավորություն չի ունենա նույնիսկ ադմինիստրատիվ ռեսուրսն օգտագործելու դեպքում։