«Կարևորագույն քաղաքական իրադարձություն է սպասվում, և ես կարծում եմ, որ բոլորը պետք է մասնակցեն այս ընտրություններին. ես անպայման մասնակցելու եմ»,- «Առաջին լրատվական»-ի հետ զրույցում «Ոտքի Հայաստան» նախաձեռնության կալանավորված անդամ Անդրիաս Ղուկասյանի խոսքերն է փոխանցում նրա կինը՝ ճարտարապետ Անահիտ Թարխանյանը։
Վերջինս նաև տեղեկացրեց, որ արդեն բանակցություններ են ընթացել Րաֆֆի Հովհաննիսյանի և Վարդան Օսկանյանի հետ, սակայն այս կապակցությամբ այլ մանրամասներ չհայտնեց՝ խնդրելով սպասել ևս մի քանի օր, մինչև վերջնական արդյունքի հասնելը։
Մեր հարցին՝ հնարավո՞ր է, որ Անդրիաս Ղուկասյանը միանա Վարդան Օսկանյանի և Սեյրան Օհանյանի համատեղ դաշինքին, տիկին Թարխանյանը պատասխանեց. «Դժվարանում եմ հիմա հստակ ասել, բայց հնարավոր է, քննարկումները դեռևս ընթացքի մեջ են»։
Հետաքրքրվեցինք՝ իսկ, մասնավորապես, Սեյրան Օհանյանի հետ կապված ի՞նչ դիրքորոշում նա ունի, այս առումով խոչընդոտ չի՞ տեսնում նրանց դաշինքին միանալու համար, տիկին Թարխանյանը ի պատասխան՝ նշեց, որ ինքը նման հարցերի չի կարող պատասխանել, քանի որ բանակցություններին անձամբ չի մասնակցում։
Անահիտ Թարխանյանը չբացառեց նաև Անդրիաս Ղուկասյանի միացումը «Ելք» դաշինքին։
«Քանի որ հիմա տարբեր ընդդիմադիր կուսակցությունների ներկայացուցիչների հետ դեռևս բանակցություններ են ընթանում, այս փուլում կդժվարանամ կոնկրետ տեղեկատվություն տրամադրել, բայց այն, որ նա այս կամ այն դաշինքին կմիանա և կմասնակցի ընտրություններին՝ հաստատ է, միանշանակ։ Մի քանի օր անց արդեն ամեն ինչ վերջնական պարզ կլինի»,- եզրափակեց նա։