Երգչուհի Մադոննան հայտարարել է, որ իր կտրուկ արտահայտություններն ԱՄՆ նախագահի հասցեին, որոնք հնչեցվել են կանանց բողոքի երթի ժամանակ, վերցված են եղել համատեքստից։ Այս մասին նա գրել է Instagram-ում։
«Ես դաժան մարդ չեմ և բռնություն չեմ քարոզում։ Կարևոր է իմ ամբողջական խոսքը, այլ ոչ թե համատեքստից վերցված մեկ արտահայտություն լսելն ու հասկանալը։ Իմ ելույթը սկսվում էր հետևյալ խոսքերով՝ «ես ցանկանում եմ սկսել սիրո հեղափոխություն», իսկ այնուհետև ես օգտվել եմ հնարավորությունից՝ համոզելու կանանց և բախտի քմահաճույքին մատնված մարդկանց, որպեսզի նրանք չհուսահատվեն, այլ համախմբվեն և օգտագործեն դա որպես մեկնակետ միավորման և աշխարհում դրական փոփոխությունների համար»,-պարզաբանել է Մադոննան։
Երգչուհին նշել է, որ իր արտահայտությունները փոխաբերական իմաստ են ունեցել։ Այդ կերպ երգչուհին ցանկացել է իր վերաբերմունքն արտահայտել տեղի ունեցողի նկատմամբ, որը նա բնութագրել է որպես «ցասում և վրդովմունք»։ «Այդուհանդերձ, ես գիտեմ, որ արարքները, որոնք արվում են ցասման զգացումից, ոչինչ չեն տալիս։ Եվ իրավիճակը դեպի լավը փոխելու միակ միջոցը դա սիրով անելն է»,-հավելել է Մադոննան՝ նշելով, որ իր համար պատիվ էր Թրամփի դեմ Վաշինգտոնում բողոքի ակցիային մասնակցելը։
