WikiLeaks կայքը ԱՄՆ նոր նախագահ Դոնալդ Թրամփի խորհրդական Քելիեն Քոնուեյի խոսքերից հետո, թե նախագահը չի հրապարակի իր հարկային հայտարարագիրը, պատրաստակամություն է հայտնել անելու դա, եթե համացանցի օգտատերերն օգնեն իրեն գտնելու այն։
Խորհրդականը ABC News-ի հետ հարցազրույցում ասել էր, որ չնայած հարկային հայտարարագրի հրապարակման պահանջով նախագահին ուղղված միջնորդագիրը հավաքել է անհրաժեշտ թվով ձայներ, Թրամփը չի հրապարակի այն։
«Ուղարկե՛ք այն Wikileaks-ին, որպեսզի դա կարողանանք անել մենք»,-ասվում է Wikileaks-ի թվիթերյան հաղորդագրությունում։
Միջնորդագրի նպատակն է պարզել, արդյո՞ք պետության ղեկավարի պաշտոնում նրա գործունեությունում չկա շահերի բախում։
Թրամփի քննադատները կասկածներ ունեն, որ միլիարդատերը օգտվել է հարուստ ֆիզիկական անձանց և խոշոր բիզնեսի համար բազմաթիվ հարկային արտոնություններից ու բացերից, ինչը թույլ է տվել նրան գրեթե չվճարել դաշնային հարկեր։