«Առաջին լրատվական»- ի զրուցակիցն է Խոսքի ազատութության պաշտպանության կոմիտեի նախագահ Աշոտ Մելիքյանը:
-Ապրիլի 2-ին սպասվող խորհրդարանական ընտրություններին ընդառաջ բոլոր հեռուստաընկերությունները և ռադիոընկերությունները արդեն հրապարակել են քաղաքական ուժերին տրամադրվելիք վճարովի եթերաժամերի սակագները, հայտնի է, որ ամենաբարձր սակագները «Արմենիա» և «Շանթ» հեռուստաընկերություններում է լինելու՝ 100 000 դրամ, և առավելագույնը 6 րոպե ժամանակահատված է տրամադրվելու: Ձեր գնահատմամբ՝ ո՞ր քաղաքական ուժերը կարող են օգտվել այս հնարավորությունից և ինչպե՞ս կանդրադառնա նրանց լսարանի վրա:
–Հեռուստաընկերությունները օրենքի պահանջն են կատարել, նրանք պարտավոր էին նշված ժամկետներում հայտարարել, թե ինչ սակագնով են քաղաքական գովազդը հեռարձակելու, և դա նորություն չէ, որ «Արմենիա»-ն և «Շանթ»-ը ամենաբարձր սակագներն են հայտարարել, այդպես է եղել նաև անցած ընտրությունների ժամանակ և սահմանադրական հանրաքվեի ժամանակ: Այստեղ իհարկե խնդիր կա. գումարի այդ չափն այնքան էլ մատչելի չէ, որպեսզի բոլոր մասնակից կուսակցությունները կարողանան ազատորեն իրենց գովազդը հեռարձակել, բայց սրանք են խաղի կանոնները… Այդ սակագները համապատասխանում են այն սակագներին, որոնք ՀԸ-ները առօրյայում են կիրառել, բայց մտածելու տեղիք է տալիս. արդյո՞ք ընտրական ժամանակահատվածում իմաստ ունի այդպիսի բարձր սակագներ հայտարարելը, ինչպես արել են «Արմենիա»-ն և «Շանթ»-ը, այնուամենայնիվ քաղաքական ենթատեքստ այստեղ կա:
-Այն առումով, որ խոչընդո՞տ է ստեղծվում այն կուսակցությունների համար, որոնք ֆինանսական խնդիրնելից ելնելով՝ չեն կարողանալու օգտվել վճարովի եթերից:
-Այո՛, այդ ենթատեքստն իհարկե կա: Հաշվի առնելով այս ընտրությունների կարևորությունը և քաղաքական ուժերին հավասար հնարավորություններ տրամադրելը, իմաստ ուներ հենց ընտրարշավի ժամանակ ցածր սակագներ սահմանել, քանի որ առօրյայում գործարարների հետ գործ ունեն ՀԸ-ները, իսկ այստեղ քաղաքական գործիչներ են, որոնք ցանկություն ունեն լիարժեք մասնացել ընտրություններին և պետք է բարենպաստ պայմաններ ստեղծվեին նրանց համար:
-Կարո՞ղ ենք ասել, որ շահեկան դիրքերում են այն կուսակցությունները, որոնք ունեն իրենց լրատվամիջոցը:
-Միշտ իհարկե ձեռքի տակ ԶԼՄ ունենալը քաղաքական կարևոր իրադարձության ժամանակ շահեկան է լինում:
Հարցազրույցն ամբողջությամբ՝ տեսանյութում: