«Քաղաքական դաշտում ի հայտ եկած «Ծառուկյան» դաշինքը, Օսկանյանի և Օհանյանի ստեղծած դաշինքը ընդդիմադիր քաղաքական ուժեր չեն: «Առաջին լրատվական»-ի հետ զրույցում այս մասին ասաց «Հանրապետություն» կուսակցության առաջնորդ Արամ Զ. Սարգսյանը:
««Ծառուկյան» դաշինքն ինքն իրեն ընդդիմադիր չի համարում, իր վերջին ելույթներում կուսակցության նախագահը իրենց մասին նշում է՝ ոչ իշխանություն: Մյուս դաշիքնում գտնվող կուսակցությունները՝ մասնավորապես Դեմոկրատական կուսակցությունը ռուսամետ մոտեցում ունի, մյուս երկու կուսակցությունների մոտեցումներին ու ծրագրերին ծանոթ չեմ:
Բայց շատ լավ ճանաչում եմ Սեյրան Օհանյանին, ում շատ-շատ հարգում եմ՝ որպես զինվորի: Արցախյան պատերազմում նրա ունեցած ներդրումն անգնահատելի է: Մարդ, որը վիրավորվելուց մեկ ամիս հետո վերադառնում է ամենաթեժ տեղեր, այդ մարդը հերոս կոչվելու իրավունք ունի: Նա եղբորիցս հետո հարազատի նման է վերաբերվել իմ ծնողներին: Բայց ես բացարձակապես չեմ ճանաչում Սեյրան Օհանյան քաղաքական գործչին: Ես չգիտեմ ինչ նպատակներով է նա քաղաքական դաշտ մտնում: Բայց այն սկիզբը, որ նա դրել է այդ ուժերի հետ, այդ ուժերը շատ ծար բեռ են և նրանց հետ շատ դժվար կլինի հաղթանակ ունենալ:
Լավ ճանաչում եմ նաև Վարդան Օսկանյանին, նրան համարում եմ շատ խելացի մարդ, բայց դժբախտաբար նա իր գիտելիքները ծառայեցրել է Ռոբերտ Քոչարյանին, ինչի հետևանքով կրակն է ընկել և առ այսօր չի կարողանում դուրս գալ»,- նշեց Ա. Սարգսյանը:
Անդրադառնալով դիտարկմանը, որ օրերս Պետրոս Մակեյանը նշել էր, որ «Ելք» դաշինքն իրեն մեկուսացրել է, այլ քաղաքական ուժերի համար կարծես դռները փակ են, Ա. Սարգսյանը նշեց. «Մեր դռները բաց են, մենք փաստաթուղթ ենք ստորագրել և հրապարակել… Եթե Մակեյանը ընդունում է մեր առաջարկած մոտեցումները, կարող էր շատ հանգիստ գալ, միանալ, դառնալ չորրորդ ուժն այս դաշինքում: Ես բետոնե պատ չեմ շարել դաշինքի շուրջը, ոչ էլ Նիկոլն է որևէ մեկին ասել՝ ցտեսություն, Էդմոնի մասին էլ չեմ ասում, նա ինքն է բոլորին մոտենում, բարևում»:
Մանրամասները՝ տեսանյութում: