«1878 թվականին, երբ հայոց կաթողիկոս Խրիմյան Հայրիկը ձեռնունայն վերադարձավ Բեռլինի կոնգրեսից, ահա այսպես էր նա իր տպավորությունները ներկայացնում: Նա ասում էր՝ Բեռլինում բոլոր հպատակ ազգերի համար մատուցվում էր հոգաճաշ հարիսա: Դուք ինձ ուղարկել էինք, որպեսզի ես գնամ և բերեմ մեր բաժինը: Բոլորը եկան և իրենց երկաթե շերեփներով վերցրին, տարան սեփական բաժինը: Երբ որ ես փորձեցի վերցնել մեր բաժինը, իմ շերեփը թղթից էր և լխճվեց, մնաց հարիսայի մեջ: Ես վերադարձա ձեռնունայն: Այդ բառերից հետո անցել է 139 տարի, սակայն հայկական շերեփը ցավոք դեռ երկաթից չէ»,- «Ելք» դաշինքի այսօրվա համաժողովում ասաց «Լուսավոր Հայաստան» կուսակցության խորհրդի անդամ Հայկ Կոնջորյանը:
«Երկաթե շերեփը միայն հզոր բանակը չէ, հզոր տնտեսությունը չէ և միայն հզոր կառավարման համակարգը չէ: Ուրեմն, ո՞րն է այն երկաթե շերեփը, որը մինչև հիմա չենք ստեղծել: Հայաստանի անկախացումից հետո մեր երկիրն անվերադարձ լքել է ավելի քան մեկ միլիոն երկու հարյուր հազար մարդ: Դա հավասար է երկու հազար նման դահլիճի: Նրանք հեռացել են, որովհետև բոյկոտել են այն պետական կարգը, որը հաստատված է Հայաստանում: Նրանց հեռացրել են աղքատությունը, անհավասարությունն ու անարդարությունը, զոռբայությունն ու իշխանության տգիտությունը: Այնտեղ, ուր մարդկային ստեղծագործ ջանքը բախվում է տգիտության անանցանելի պատին, պետությունը կորցնում է սեփական գրավչությունն իր քաղաքացիների աչքում: Այդ մարդիկ հեռացել են ոչ թե իրենց հայրենիքից, այլ պետությունից, որովհետև հայրենիքն առանց ուժեղ պետության նման է թղթե շերեփի: Ուրեմն երկաթե շերեփը ուժեղ պետությունն է»,- նշեց Կոնջորյանը:
Մանրամասները՝ տեսանյութում: