Կառավարության հունվարի 19-ի նիստը լուսաբանած լրագրողները նկատել էին, որ կառավարության շենքում հսկողություն իրականացնող ավտոմատավորների թիվն ավելացել է։
«Ժողովուրդ» օրաթերթն էլ նախօրեին գրել էր, թե ուժեղացվել է նաև Սերժ Սարգսյանի անվտանգությունը։ Թերթի տեղեկությունների համաձայն՝ դա կապված է ԱԱԾ-ի օպերատիվ տեղեկության հետ, թե Սերժ Սարգսյանի դեմ նոր մահափորձ է ծրագրված:Սերժ Սարգսյանի անվտանգության պետ Հրաչյա Հարությունյանը, թերթի հետ զրույցում, ըստ էության, չհերքելով տեղեկությունը նշել է․ «Եթե նման բան բացահայտվեր, ապա այն հայտնի կլիներ բոլորին»:
Ազգային անվտանգության ծառայության պետի նախկին տեղակալ Գուրգեն Եղիազարյանը, մինչդեռ, մեզ հետ զրույցում ասաց՝ թե չի կարծում, որ Սերժ Սարգսյանի դեմ մահափորձ է ծրագրված։
«Ճիշտն ասած` չեմ հավատում նման բանի։ Եթե նման բան լիներ, հիմա ձերբակալություններ կլինեին՝ կիմանայինք։ Այդ ամենը չկա, կարող է մարդիկ կան, ուզում են իրեն շատ ավելի հարազատ երևալ ու նման տեղեկություններ են տարածում»,- ասաց Եղիազարյանը։
Մեր զրուցակիը հավելեց․ «Եթե նման բան լիներ, ապա պատահական քիլերներ չէին լինի։ Նման աղմուկ-աղաղակ չէր լինի հանրապետությունով մեկ։ Նման բաները ի հայտ են գալիս վերջին պահին․ կամ անհաջող մահափորձ է լինում՝ մենք իմանում ենք, կամ էլ անում վերջացնում են։ Թույլ տվեք ասել, որ սա մեր օրերի հերթական բլեֆն է»։
Գուրգեն Եղիազարյանը կարծում է, որ մարդիկ պարզապես մտածում են՝ ինչ որ բանի կհասնեն նման տեղեկություններ տարածելով․ «Այդ նույն ձևով եղավ Նորքի ահաբեկչական խմբի գործողությունները՝ իբր Հայաստանը պետք է արյան ծով սարքեին․ բայց մինչ օրս ի՞նչ։ Հայր Անտոնիոն դրսում է իր համար։ Թույլ տվեք օգտագործել այս բառը՝ Հայր Անտոնիոն իր համար ման է գալիս դրսում, բայց հիշո՞ւմ եք՝ ով էր նա։ 70 հազար դոլարով Հայաստանն արյան ծով սարքող խմբի ֆինանսավորողը, հեսա դատաքննություն կլինի՝ այդ փուչիկն էլ կպայթի»։
