ՀՀԿ խորհրդի նիստը տեղի կունենա հունվարի 26-ին. Այս մասին քիչ առաջ ՀՀԿ ԳՄ նիստից հետո լրագրողների հետ զրույցում հայտնեց ՀՀԿ մամլո խոսնակ Էդուարդ Շարմազանովը:
Վերջինս հայտնեց, որ ՀՀԿ Գործադիր մարմնի նիստը վարել է ՀՀԿ նախագահ Սերժ Սարգսյանը: Նիստում քննարկվել է ներկուսակցական, ներքաղաքական հարցեր, ԳՄ ներկայացուցիչները ներկայացրել են իրենց դիտարկումները քարոզարշավի ժամանակ կուսակցության ռազմավարության, թեկնածուների հետ կապված խնդիրները, կուսակցության խորհրդի անդամների թեկնածուների հարց է քննարկվել:
Լրագրողների հարցին, թե այսօրվա նիստին նախկին վարչապետ Հովիկ Աբրահամյանը մասնակցե՞լ է, թե՞ ոչ՝ վերջինս հայտնեց, որ չի մասնակցել, իսկ չմասնակցելու պատճառների մասին որևէ բան չի կարող ասել:
«Ցուցակի հետ կապված հարց չի քննարկվել, դա կքննարկենք խորհրդի նիստից հետո, քարոզչական խումբը և շտաբի աշխատանքները սկսվել են, բայց չեն ավարտվել, մինչև փետրվար ամիսը կներկայացնենք շտաբի կառուցվածքը»,- ասաց Շարմազանովը:
ՀՀԿ խոսնակն անդրադարձավ նաև վարչապետ Կարեն Կարապետյանի՝ ՀՀԿ ցուցակում լինել-չլինելու հարցին՝ նշելով. «Եթե պարզվի, որ վերջին տարիներին վարչապետի Հայաստանում չբնակության հարցը խնդիր է հանդիսանալու, ապա նա չի լինի կուսակցության համամասնական ցուցակում»: