ՄԱՀՀԻ-ի հիմնադիր, քաղaքագետ Ստեփան Սաֆարյանը, «Առաջին լրատվական»- ի հետ զրույցում անդրադառնալով հարցին, թե քաղաքական դաշտում ստեղծված խառնաշփոթի մեջ ինչպես պետք է տարբերակել իրական ընդդիմադիր քաղաքակն ուժերին իշխանության արբանյակներից, նշեց. «Թերևս թացը չորից, իշխանության ներդրած դերակատարներին ընդդիմությունից զանազանելու մի քանի չափանիշներ կան, որոնցից առաջինն այն է, թե ինչ այլընտրանքային ծրագիր են ներկայացնում քաղաքական ուժերը:
«Պատկերը մտահոգիչ է, որովհետև բոլոր նրանք, ովքեր հայտ են ներկայացնում ազգին փրկելու, երկիրը ճգնաժամից հանելու, այդ մարդիկ պատասխանատու են երկրում առաջացած ճգնաժամի և հետընթացի համար: Քիչ դերակատարներ կան, ովքեր քաղաքական պատասխանատվություն չեն կրում դրա համար:
Եթե դիտարկենք հիմնական միավորներին, որոնք հայտ են ներկայացրել խորհրդարանական ընտրություններին մասնակցելու, առաջինը ՀՀԿ-ն է, որը երբևէ չի խուսափել ստանձնել պատասխանատվություն և՛ լավի, և՛ վատի համար: Սա այն կուսակցությունն է, որը համաձայնեց գնալ Հայաստանի ինքնիշխանության սահմանափակմանը»,- նշեց Ս. Սաֆարյանը: Նրա խոսքով՝ երկրորդը Գագիկ Ծառուկյանն է, որի ներկայացրած քաղաքական ուժը ի զորու չէ այլընտրանքային կետեր առաջ քաշելու:
Քաղաքագետի դիտարկմամբ՝ Ծառուկյանին քաղաքական տեխնոլոգները փորձում են ներկայացնել Դեմիրճյանի կերպարով, որպես բարեգործ, «Գագիկ կառուցող», և նրա «Վազգեն Սարգսյանը» Սեյրան Օհանյանն է: Քաղաքագետի դիտարկմամբ՝ պաշտպանության նախկին նախարար Ս. Օհանյանը չի կարող հավակնել Վազգեն Սարգսյանի կերպարին, ով հաղթած հրամանատար էր. «Ապրիլյան պատերազմը չափազանց խոցելի վիճակում է դրել Ս. Օհանյանին, եթե չասեմ նաև քաղաքական պատասխանատվության տակ՝ մեր անհարկի զոհերի, պատերազմին անպատրաստ լինելու, բանակում տիրող խայտառակ վիճակի, ռազմաքաղաքական ռիսկերի ճիշտ չկառավարելու հետ կապված»:
Սաֆարյանի խոսքով՝ Գագիկ Ծառուկյանը ևս չի կարող հանդես գալ Կարեն Դեմիրճյանի իմիջային կերպարով: «Տեսանելիորեն քաղաքական տեխնոլոգները նախընտրել եմ «Միասնություն» դաշինքի ուրվագիծը՝ շաբլոնը բերել, և այդ պարամետրերին չհամապատասխանող դերակատարներին տեղավորել դրա մեջ»,- ընդգծեց քաղաքագետը՝ հավելելով, որ չի կարծում, թե այդ երկու քաղաքական գործիչները՝ Ծառուկյանը և Օհանյանը, մինչև ընտրությունները կմիավորվեն:
Մանրամասները՝ տեսանյութում: