Human Rights Watch կազմակերպության համաշխարհային զեկույցում Հայաստանի մասով անդրադարձ է կատարվել հուլիսյան իրադարձություններին: Զեկույցում մասնավորապես նշվում է, որ Հայաստանի կառավարությունը չի ապահովել պատասխանատու իրավապահ մարմինների պաշտոնատար անձանց վստահելի և թափանցիկ հաշվետվողականություն:
«Առաջին լրատվական»– ի հետ թեմայի շուրջ զրույցում իրավապաշտպան Ժաննա Ալեքսանյանը նշեց, որ Human Rights Watch կազմակերպության ներկայացուցիչները Հայաստանում հետաքննություն են կատարել, շատ լավ տեղյակ են թե ինչ է կատարվել, զրուցել են բազմաթիվ վկաների հետ: «Հայաստանի իշխանությունները բացարձակապես հաշվի չեն առնում միջազգային զեկույցները և շարունակում են իրենց նույն գործելաոճը»,- նշեց իրավապաշտպանը:
Տարեվերջին նախագահ Սերժ Սարգսյանը պարգևատրեց ոստիկանապետին և նրա տեղակալ Լյովա Երանոսյանին՝ ոսկե մեդալով: Իրավապաշտպանի խոսքով՝ դա հաստատումն է այն բանի, որ «Ս. Սարգսյանը մի կողմից հանրությանն ասում է՝ ոստիկանությունը իմ աջ ձեռքն է, ինձ է պաշտպանում ոչ թե ձեզ, մյուս կողմից՝ ոստիկանությունը հաստատում է դա: Նրանք հանցագործություն են կատարում, իսկ նախագահը պարգևատրում է. այսպիսին է իրավիճակը»:
Անդրադառնալով Սեյրան Օհանյանի՝ քաղաքականություն մուտք գործելու վերաբերյալ հարցին, թե արդյոք կարելի է նրան վստահել՝ հաշվի առնելով Մարտի 1-ի իրադարձությունների փաստը, իրավապաշտպանը նշեց, որ Ս. Օհանյանի վարկը, որպես պաշտպանության նախարար, շատ դրական է: Իրավապաշտպանի խոսքով՝ Մարտի 1-ին Սեյրան Օհանյանը դերակատարում չի ունեցել, հրաման տվողը Քոչարյանն է եղել:
Մանրամասները՝ տեսանյութում: