10 տարի է անցել Ստամբուլում հայազգի լրագրող Հրանտ Դինքի սպանությունից, սակայն հայերին և թուրքերին այդպես էլ չի հաջողվել ձեռք բերել Հրանտի կողմից բաղձալի հաշտեցումը։ Այս մասին գրում է Agence France-Presse-ը՝ «Ակօս» թերթի խմբագիր Հրանտ Դինքի սպանության 10-րդ տարելիցին նվիրված հոդվածում։
Հոդվածագիրը հիշեցնում է, որ Դինքը սպանվել է 2007թ. հունվարի 19-ին «Ակօս» թերթի խմբագրատան առաջ։ Դինքի սպանությունից հետո հազարավոր թուրքեր դուրս եկան փողոցներ՝ վանկարկելով «Մենք բոլորս Հրանտ Դինք ենք»։
«Հրանտը երկու կարևոր գործ էր անում. խրախուսում էր Թուրքիայի և Հայաստանի միջև երկխոսությունը ու թուրք հասարակությանը ներկայացնում Հայկական հարցը»,- կարծում է «Ակօս» թերթի գլխավոր խմբագիր Էդվարդ Տանզիկյան։
Դինքը ծնվել է Անատոլիայի Մալաթիայում, որտեղ ժամանակին մեծ թվով հայեր են ապրել, իսկ այժմ գրեթե հայեր չկան։ Նա Ստամբուլ եկավ 1996 թվականին և հիմնեց «Ակօս» թերթը, որը Թուրքիայում առաջին հայկական թերթը չէր, սակայն առաջինն էր, որ սկսեց լույս տեսնել հայերեն և թուրքերեն։ Այդպիսով, Դինքը խթանեց մինչ այդ երկար տարիներ տաբու դարձած թեմաների քննարկումը։
«Հրանտ Դինքը հնարավորություն ընձեռեց թուրք հասարակությանը ներկայացնելու Հայկական հարցը։ Նա մեծ դերակատարում ունեցավ իրազեկման գործում, բայց, ցավոք, վճարեց իր կյանքով»,- ասում է «Ակօս» թերթի հայերեն բաժնի խմբագիր Բագրատ Էստուկյանը, ով անձամբ ճանաչել է Դինքին։
Թեև Դինքին սպանողը, ով այն ժամանակ ընդամենը 17 տարեկան էր, բավական արագ ձերբակալվեց և դատապարտվեց, սակայն դատավարությունը շարունակվում է մինչ օրս, և Դինքի կողմնակիցները կորցնում են վստահությունը, թե դատական համակարգը կկարողանա ի վերջո պարզել իրականությունը։ «Տասը տարի անց դատարանը այդպես էլ լույս չի սփռել սպանության վրա։ Մենք ակնկալիքներ չունենք այդ դատավարությունից»,- ասում է Էստուկյանը։
Տաբուն, որը վերացրեց Դինքը, մնում է կոտրված։ Դեռ մի քանի տարի առաջ հնարավոր չէր պատկերացնել հայի ներկայությունը թուրքական խորհրդարանում, էլ չենք խոսում Ցեղասպանություն եզրույթի օգտագործման մասին, ինչն արեց Գարո Փայլանը՝ Թուրքիայի քրդամետ Ժողովուրդների դեմոկրատական կուսակցության հայազգի պատգամավորը, որին զրկել են խորհրդարանական երեք նիստի մասնակցելու իրավունքից թուրքական Մեջլիսում Հայոց ցեղասպանության մասին խոսելու համար։ Այնուամենյանիվ, վերլուծաբանները կարծում են, որ հաշտեցում դեռ հնարավոր է՝ ասվում է հոդվածում։