Վրաստանում 80 ոչ կառավարական կազմակերպություն կառավարությանն է դիմել ուղերձով, որում պահանջում են հրապարակել ռուսական «Գազպրոմ» ընկերության հետ Վրաստանով Հայաստան գազի տարանցման վերաբերյալ պայմանագրի մանրամասները, հաղորդում է «Գրուզիա Օնլայն»-ը։
«Վրաստանի և Ռուսաստանի միջև նման պայմանագրի հարցը չի կարող դիտարկվել միայն կոմերցիայի շրջանակներում, քանի որ Ռուսաստանն օկուպացրել է մեր երկիրը»,- հայտարարել է Տնտեսական քաղաքականության հետազոտական կենտրոնի տնօրեն Նինո Էվգենիձեն «Ռուսթավի-2» հեռուստաընկերությանը տված հարցազրույցում:
Քաղաքացիական սեկտորը կառավարությանն ուղղված ուղերձում նշել է այն վտանգները, որոնք կարող է առաջացնել ռուսական ընկերության հետ պայմանագրի պայմանների փոփոխությունը:
«Անհասկանալի է, երբ մեզ ասում են, որ այդ պայմանագիրը կոմերցիոն գաղտնիք է, այն դեպքում, երբ ռուսաստանն զավթիչ է։ Սա պարտվողական համաձայնագիր է, որը վնասում է Վրաստանին»,- լրագրողներին հայտարարել է Արևելյան գործընկերության քաղաքացիական հասարակական ֆորումի ազգային հարթակի նախագահ Լաշա Տուգուշին:
Ավելի վաղ հաղորդել էինք այն մասին, որ Վրաստանի նախագահ Գերոգի Մարգվելաշիվլիի մամուլի խոսնակ Էկա Միշվելաձեն հայտաարել է այն մասին, որ պետության ղեկավարի կարծիքով Գազպրոմ Էքսպորտ» ՍՊԸ-ի հետ կնքված համաձայնագիրը կվնասի երկրին։