«Քաղաքացիական պայմանագիր» կուսակցությունը ձևավորել է առաջիկա խորհրդարանական ընտրությունների համամասնական ցուցակը: Կուսակցության համամասնական ցուցակը կգլխավորի կուսակցության վարչության անդամ Նիկոլ Փաշինյանը:
«Ելք» դաշինքի մյուս՝ «Լուսավոր Հայաստան» կուսակցությունը մեկ շաբաթ առաջ է հստակեցրել իր ցուցակը: Կուսակցության ղեկավար Էդմոն Մարուքյանը «Առաջին լրատվական»-ի հետ զրույցում նշեց. «Մեր ցուցակներն ավելի վաղ են հստակեցված եղել, ուղղակի մենք դրանք չենք հրապարակել, քանի որ քննարկումները այլ հարցերի վերաբերյալ շարունակվում են, իսկ թե ովքեր են ընդգրկված և ցուցակի որ համարն են զբաղեցնելու՝ մեծ հաշվով հայտնի են, հայտնի են տարածքները, բայց կարծում եմ՝ դեռ ժամանակ ունենք հրապարակելու. առաջիկայում կներկայացնենք»:
Հավանաբար այս ամսվա ընթացքում կուսակցությունը կներկայացնի իր ցուցակը. «Մեր առջև ներկայացնելու խնդիր չենք դրել, որովհետև այդ թեկնածուների ներկայացման խնդիրն ավելի շատ տեղական նշանակություն ունի, տեղերում պետք է նրանք ներկայացվեն՝ այն տարածքներում, որտեղ նրանք առաջադրվում են: Եվ տարածքներ կան, որ արդեն գիտեն՝ ով է լինելու մեր թեկնածուն որոշ համայնքներում, և տարածքներ էլ կան, որ դեռ չգիտեն: Ընդհանուր ցանկը երևի թե հունվարի վերջին կներկայացնենք»:
Հարցին՝ ռեյտինգային ցուցակներում առաջադրված երիտասարդ քաղաքական գործիչները ինչպե՞ս են պայքարելու թաղային հեղինակություն համարվող իշխանական թեկնածուների դեմ, Էդմոն Մարուքյանը ասաց. «Որովհետև ընտրությունը քաղաքական է, համամասնական տրամաբանություն կա այս ընտրության մեջ, և այդ տրամաբանությամբ պետք է կազմակերպվի: Ես չեմ կարծում, որ մենք անմրցունակ թեկնածուներ ենք առաջադրում, մեր թեկնածուները լուրջ մրցակցային թեկնածուներ են»:
Կարճ չի՞ լինի ժամանակը քարոզարշավին ծրագրեր ներկայացնելու համար՝ հարցին էլ պատասխանեց. «Քարոզարշավի ժամանակահատվածը ամեն դեպքում կարճ է, բայց չեմ կարծում, թե այդ 25 օրերի ընթացքում թե՛ հեռուստաընկերություններն օգտագործելով, թե՛ տարածքներում շատ ակտիվ գործելով չենք հասցնի իրականացնել»:
Հարցին՝այդքան ընտրատարածքներում ռեյտինգային թեկնածուներ առաջադրելու համար անհրաժեշտ թվով մարդիկ կա՞ն. «Կան, բայց խնդիրն այն է, որ այս իրավիճակում մեզ համար ավելի հեշտ է, որ մենք դաշինքով ենք գնում, և եթե խնդիր առաջանա ինչ-որ տարածքում, մենք մեկս մյուսիս պետք է փոխլրացնենք: Այսինքն՝ որ տարածքում որ ուժն ավելի ուժեղ թիմ կունենա, կարող ենք այդ ուժի ներկայացուցչին որպես թեկնածու առաջադրել»:
Լուսանկարը՝ Photolure-ի
