Երևանում տեղակայված արագաչափերի 90 տոկոսը օրական 20-ից պակաս խախտում է արձանագրում, 10 տոկոսը՝ միջինում 20, և 5- տոկոսը՝ 30-ից ավել: Կան արագաչափեր, որոնք երբեմն ռեկորդներ են սահմանում. մասնավորապես Արտաշիսյան փողոցում տեղակայված արագաչափը 2016-ի հոկտեմբերին 3725 խախտում էր արձանագրել:
«Արագաչափերն ու տեսախցիկները երթևեկության կանոնների պահպանման երաշխիք չեն». այս մասին «Առաջին լրատվական»– ի հետ զրույցում ասաց «Վարորդի ընկեր» ՀԿ նախագահ Տիգրան Քեյանը՝ ի պատասխան հարցի, թե արագաչափերը որքանո՞վ են նպաստում երթևեկության կանոնների պահպանմանը:
Նրա խոսքով՝ որտեղ նոր արագաչափ է տեղադրվում, վարորդները տեղյակ չեն լինում և երթևեկում են իրենց սովորած արագությամբ, և խախտումները շատ են արձանագրվում: Մի շարք տեղերում տրամաբանություն չկա, թե ինչու է արագաչափ տեղադրված, օրինակ՝ որոշ դպրոցների մոտ, և կան դպրոցներ էլ, որոնց մոտ արագաչափ սարքերի անհրաժեշտություն կա, սակայն տեղադրված չեն:
«Երթևեկության կանոնների պահպանման երաշխիքը երթևեկության կուլտուրան է, որը պետք է ձևավորվի փոքրուց»,- նշեց Տ. Քեյանը՝ հավելելով, որ պետք է դպրոցում ճանապարհային երթևեկության կանոնների մասին առարկան ուսումնասիրել, հետո անցնել վարորդական դասընթացներ, ապա նոր ստանալ վարորդական իրավունքի վկայական, մինչդեռ հիմա օնլայն թեստերի պատասխանելով՝ վարորդական իրավունքի վկայական են ստանում:
Մանրամասները՝ տեսանյութում: