Ֆուտբոլի Անգլիայի Լիգայի գավաթի խաղարկության կիսաեզրափակչի առաջին խաղում «Մանչեսթեր Յունայթեդը» սեփական հարկի տակ 2:0 հաշվով հաղթեց «Հալ Սիթիին»՝ գործնականում ապահովելով մասնակցությունը եզրափակչում: Խաղից առաջ «Մանչեսթերի» գլխավոր մարզիչ Ժոզե Մոուրինյոն հայտարարել էր, որ այս դիմակայությունն իրենց համար շատ ավելի կարևոր է, քան հունվարի 15-ին կայանալիք Պրեմիեր լիգայի 21-րդ տուրի «Լիվերպուլի» հետ սկզբունքային մրցավեճը:
Հասկանալի է, Մոուրինյոյին և «Մանչեսթեր Յունայթեդին» այսօր անհրաժեշտ է տիտղոս, ցանկացած որակի: Այդուհանդերձ, Մոուրինյոն անսպասելիորեն խաղադաշտ դուրս չբերեց թիմի առաջատար և լավագույն ռմբարկու Զլատան Իբրահիմովիչին: Կենտրոնական հարձակվողի պարտականությունը կատարեց երիտասարդ Մարկուս Ռեշֆորդը: Վերջինս, կարելի է ասել, ոչնչով աչքի չընկավ, ինչի հետևանքով առջևի գծում «Մանչեսթեր Յունայթեդում» տոն էին տալիս կիսապաշտպանները՝ ի դեմս Մխիթարյանի, Պոգբայի և Մատայի:
Ի տարբերություն Իբրահիմովիչի՝ Ռեշֆորդին չէր հաջողվում առջևում գնդակ պահել և կոորդինացնել եզրերում խաղացող ֆուտբոլիստների գործողությունները: Թե Մխիթարյանը, թե Մատան և թե Պոգբան դեռևս առաջին կեսում փորձում էին հեռու տարածությունից գրավել մրցակցի դարպասը:
Ըստ էության, այս խաղում հաղթանակի բանաձև դարձավ հենց Մխիթարյան-Պոգբա-Մատա խաղային օղակը, որից կտրված էր թիմի ավագ Ուեյն Ռունին: Վերջինս լինելով նախաձեռնող ֆուտբոլիստ՝ ներկայիս «Մանչեսթերում» այլևս չի կարող կատարել խաղի դիրիժորի պարտականությունը, քանզի դաշտի կենտրոնում գլխավոր ֆիգուրը Պոգբան է, ով բավական արդյունավետ համագործակցում է Մխիթարյանի և Իբրահիմովիչի հետ:
Ռունիին փոխարինելուց հետո նրա դիրքում Մոուրինյոն վստահեց Մխիթարյանին, ով արդեն իսկ ձեռք է բերել ունիվերսալ ֆուտբոլիստի համբավ: Երբ Մխիթարյանը դուրս էր մնացել «Մանչեսթեր Յունայթեդի» մեկնարկային կազմից, հարցազրույցներից մեկում Մոուրինյոն հայտարարել էր, որ 11 ֆուտբոլիստների շարքում ընդգրկվելու համար հայ կիսապաշտպանը պետք է Մատայից լավ խաղա: Այս հայտարարությունից հետո շատերը Մատային և Մխիթարյանին մրցակիցներ են համարում:
Երեկ, սակայն, Մատա-Մխիթարյան խաղային զույգը բեկեց հանդիպման ընթացքը: Դեռևս առաջին կեսում Մատայի փոխանցումից հետո Մխիթարյանը չօգտագործեց իրական գոլային պահը, իսկ երկրորդ կեսում Մատան հաշիվը բացեց մեր ֆուտբոլիստի փոխանցումից հետո:
Հանգստանալու հնարավորություն տալով Իբրահիմովիչին՝ Մոուրինյոն ապացուցեց, որ միանգամայն վստահում է կիսապաշտպաններին, և հարկ եղած դեպքում կա հաջողության հասնելու ձևավորված, այլընտրանքային բանաձև՝ Մխիթարյան-Պոգբա-Մատա խաղային օղակը:
Ինչ վերաբերում է զուտ Մխիթարյանի խաղին, ապա վստահաբար կարելի է ասել, որ նա լավագույններից մեկն էր դաշտի տերերի կազմում: Կարծում ենք՝ եթե Մոուրինյոն մեր ֆուտբոլիստին Ռեշֆորդի փոխարեն օգտագործեր հարձակման կենտրոնում, ապա «Մանչեսթեր Յունայթեդը» էլ ավելի տպավորիչ հաղթանակի կհասներ: Չնայած Ռեշֆորդն ունի բարձր արագություն, այդուհանդերձ՝ վճռական պահերին զգացնել է տալիս նրա կատարողական վարպետության պակասը: Դրանում համոզվեցինք նաև երեկ, երբ Մխիթարյանը մոտ 40 մետր անցում կատարելուց հետո հարվածի դուրս բերեց նրան:
Ռեշֆորդը դեռևս երիտասարդ է, և ակնհայտ է, որ Մոուրինյոն դեռևս չի կողմնորոշվել խաղադաշտում այս ֆուտբոլիստի դերակատարության հարցում: Ամեն դեպքում փաստ է, որ պորտուգալացի մասնագետը «Մանչեսթերին» դուրս է բերել խաղային ճգնաժամից, և այսօր հեղինակավոր ակումբը պատրաստ է պայքարել ամենաբարձր տիտղոսների համար:
Չորս օրից «Մանչեսթեր Յունայթեդը» սեփական հարկի տակ կմրցի «Լիվերպուլի» հետ: Վերջինիս մարզիչն է գերմանացի մասնագետ Յուրգեն Կլոպը, ում գլխավորությամբ Մխիթարյանը մեծ ճանաչում ձեռք բերեց Դորտմունդի «Բորուսիայում»:
