Իրանական IRNA լրատվական գործակալության փոխանցմամբ՝ Իրանի գնած Airbus առաջին օդանավը ակնկալվում է, որ Թեհրանի օդանավակայանում վայրէջք կկատարի հունվարի 12-ին։
Այդ մասին հայտարարել է իրանական Iran Air պետական ավիափոխադրողի պաշտոնական ներկայացուցիչ Շահրոհ Նոուշբադին։ Նրա խոսքերով՝ Airbus A321-ը Թեհրան կժամանի հինգշաբթի ժամը 14.30-ին։
Նոր ինքնաթիռը նախատեսված է 190 ուղևորի համար։ Ակնկալվում է, որ այն կիրականացնի ներքին չվերթներ։ Իրանը վերջին 30 տարում առաջին անգամ է կարողանում օդանավ գնել Airbus-ից, որը տեղի է ունենում միջազգային բեռնարգելքի վերացման շնորհիվ։
Airbus-ը նախորդ տարվա դեկտեմբերին Iran Air-ի հետ ստորագրել է 100 օդանավ վաճառելու մասին պայմանագիր։ Խոսքը Airbus A320 տիպի 46, A330 տիպի 38 և A350 XWB տիպի օդանավերի մասին է, որոնց մատակարարումը մեկնարկում է 2017 թվականի հունվարին։