ՀՀ Մարդու իրավունքների պաշտպանի 2017 թվականի հունվարի 9-ի որոշմամբ ստեղծվել է ՄԻՊ-ին առընթեր Զինծառայողների իրավունքների հարցերով փորձագիտական խորհուրդ: ՀՀ ՄԻՊ Արման Թաթոյանը «Առաջին լրատվական»- ի հետ զրույցում մանրամասնեց, թե ինչ նպատակով է ստեղծվել, ինչ գործունեություն է ծավալելու և ինչ խնդիրներ է լուծելու Զինծառայողների իրավունքների հարցերով փորձագիտական խորհուրդը:
«Զինծառայողների իրավունքների պաշտպանությունը մեր աշխատանքի առանցքային ուղղություններից մեկն է. սա այն ոլորտն է, որը պահանջում է մասնագիտական քրտնաջան և մանրակրկիտ աշխատանք, դրանով էր պայմանավորված, որ 2016-ին մեր աշխատակազմում ստեղծվեց զինծառայողների իրավունքների մասնագիտացված ստորաբաժանում, որի իրավունքներն էլ ավելի են ամրապնդվելու:
Ակնհայտ է, որ այս ոլորտում անհրաժեշտ է ներգրավել նաև հասարակական կազմակերպությունների ներկայացուցիչների, անկախ փորձագետների և այս առումով ավելի պրոֆեսիոնալ դարձնել աշխատանքը: Այս նկատառումներով ստեղծվել է Զինծառայողների իրավունքների հարցերով փորձագիտական խորհուրդը, որում ընդգրկված են հոգեբաններ՝ հատուկ կրթությամբ, սոցիոլոգ, իրավաբաններ: Արդեն մի քանի հարցեր քննարկվել են, պատրաստվում ենք առաջիկայում ներկայացնել իրավասու մարմիններին և առաջին հերթին Պաշտպանության նախարարությանը»,- նշեց Ա. Թաթոյանը:
ՄԻՊ-ը նաև ընգծեց, որ առանձնահատուկ խնդիր է, օրինակ, սահմանին ծառայող զինվորների հետ հոգեբանական աշխատանքներ իրականացնող հոգեբանների ինստիտուտի զարգացումը, ամրապնդումը: Նա հավաստիացրեց, որ խորհուրդը հնարավորություն կտա զինծառայողների ընտանիքների բողոքների դեպքում օրենքի շրջանակներում քննարկել հարցերը:
«Խորհրդի գլախավոր առաքելությունը լինելու է նաև այն, որ անհատական բողոքների հիման վրա վեր են հանվելու համակարգային հարցերը, հասարակական կազմակերպությունների, փորձագետների ներգրավմամբ փորձելու ենք գտնել լուծման ուղիները»,- նշեց Ա. Թաթոյանը:
Մանրամասները՝ տեսանյութում: