Հունվարի 6-ին Թեհրանում՝ «Մարիամ» արվեստի պատկերասրահում, բացվել է հայ-իրանական ժամանակակից արվեստի ցուցադրություն, որը կրում է «Եղբայրություն» (Sodality) անվանումը։
Ցուցահանդեսը, որն անցկացվում է «Արտակ Մանուկյան» թանգարանի հետ համագործակցությամբ, նպատակ ունի մեծարելու հայ արվեստագետների ազդեցությունն իրանական ժամանակակից արվեստի վրա։
Ցուցահանդեսում ներկայացված են Լիլիթ Տերյանի (քանդակագործ), Սերժ Ավագյանի (գրաֆիկական դիզայներ), Էդման Այվազյանի (նկարիչ, ճարտարապետ և լուսանկարիչ), Գառնիկ Տեր-Հակոբյանի (նկարիչ, ճարտարապետ) աշխատանքները։
Ժամանակակից արվեստի իրանահայ պիոներների ցուցահանդեսին մասնակցում են արվեստի տարբեր ճյուղերում ստեղծագործողներ։ Նրանցից մի քանիսն առավել նշանավոր են իրենց վարպետության և երիտասարդ սերունդների վրա ունեցած ազդեցության շնորհիվ։
Հայկական արվեստն ու մշակույթը շարունակաբար գոյակցել են իրանական արվեստի ու մշակույթի հետ՝ ազդեցություն թողնելով միմյանց վրա՝ գրում է իրանական Payvand կայքը։
Ցուցահանդեսի բացման արարողությանը մասնակցել են Հայ Առաքելական եկեղեցու Թեհրանի թեմի առաջնորդ Սեպուհ արքեպիսկոպոս Սարգսյանը և մշակույթի ու արվեստի հարցերով Թեհրանի քաղաքապետարանի վարչության տնօրեն Մահմուդ Սալահին։
Ցուցահանդեսը բաց կլինի մինչև հունվարի 11-ը։