Իրանական Press-TV հեռուստաալիքի փոխանցմամբ՝ Իրանի խորհրդարանն օրինագիծ է ընդունել, որը երկրի կառավարությանը պարտավորեցնում է մեծացնել Իրանի պաշտպանական պոտենցիալը ազգային անվտանգությունն ապահովելու համար։
Ընդունված օրինագիծը երկրի գործադիր իշխանություններին պարտավորեցնում է ընդլայնել առաջին հերթին հրթիռային համակարգերի արտադրությունն ու կարճ, միջին ու հեռահար գործունեության հակաօդային պաշտպանության միջոցների հնարավորությունները։
Օրինագծում նշված են նաև ազգային անվտանգության ապահովման ոլորտում իրանական իշխանության այլ անելիքների մասին ևս։ Դա մասնավորապես վերաբերում է ռազմական կառավարման ու կապի ոլորտում առաջադեմ տեխնոլոգիաների կիրառմանը, կիբեր անվտանգության ամրապնդմանը, ահաբեկչության դեմ պայքարի նպատակով ռազմական տեխնիկայի մշակմանը, Իրանի ռազմաօդային ուժերի զարգացմանը, այդ թվում նաև նոր մարտական ինքնաթիռների ու ուղղաթիռների, ինչպես նաև անօդաչու թռչող սարքերի մշակմանը, Իրանի ռազմածովային ուժերի ուժեղացմանը՝ մասնավորապես արագընթաց ռազմանավերի ու ծանր սուզանավերի ձեռք բերման միջոցով, մարտական ստորաբաժանումների ու արագ արձագանքման ուժերի տեխնիկական միջոցների արդիականացմանը։
Փաստաթղթին աջակցել է 173 պատգամավոր, դեմ՝ 10-ը, 6 պատգամավոր էլ ձեռնպահ է մնացել։