Անդրադառնալով դիտարկմանը, որ առաջիկա համապետական ընտրություններին ընդառաջ շատերը հայտարարել են իրենց մասնակցության մասին, կազմվում են դաշինքներ, և հարցին, թե որտեղ է լինելու «Պահպանողական կուսակցություն»- ն ընտրություններին, «Առաջին լրատվական»- ի հետ զրույցում «Պահպանողական կուսակցության» նախագահ Միքայել Հայրապետյանը, նշեց, որ ամենայն հավանականությամբ իրենց կուսակցությունը կլինի գաղափարախոսական այն դաշտում, որը միտված է դեպի արևմտյան արժեհամակարգը. «Եթե, իհարկե, պարզ չդառնա, որ սա ընտրություն չէ, այլ ծաղրուծանակ, այդ դեպքում մասնակցությունը մեզ համար անպատվաբեր կլինի. դա առաջիկայում կպարզվի»:
Այլ քաղաքական ուժերի հետ հնարավոր համագործակցության վերաբերյալ Միքայել Հայրապետյանը հավաստիացրեց, որ տարբեր ուժերի հետ անդրջրյան պայմանավորվածություններ կան, բայց առայժմ դրանք խոսակցությունների մակարդակում են. «Մենք՝ ինքներս, կողմնորոշված չենք, դա ոչ թե շահադիտական հաշվարկումներից է գալիս, այլ նրանից, որ մինչև ընտրությունները տարածաշրջանում բացառված չեն շատ լուրջ փոփոխությունները՝ կապված համաշխարհային փոփոխությունների, նաև մեր տարածաշրջանում «եռացող կաթսայի» որոշակի փոփոխությունների հետ:
Անդրադառնալով հարցին, թե ինչպես է հնարավոր քաղաքական դաշտում տարբերակել ընդդիմադիր քաղաքական ուժերին իշխանական արբանյակներից, Մ. Հայրապետյանը նշեց, որ, թերևս, այս առումով ազնիվ է միայն ՀՀԿ-ն: «Տարբերակաման ոչ մի ցուցիչ գոյություն չունի, որովհետև միայն խոսքերով չէ, մարդիկ ունեն կենսագրություն, և ցավալի է, որ իրենց կենսագրությունից շատերը հրաժարվում են: Շատ ավելի հարգելի են նրանք ովքեր իրենց կենսագրությունից չեն հրաժարվում, ապաշխարում են և անցնում են առաջ: Բայց ապաշխարանքի խոսք մենք այդպես էլ չենք լսել ոչ մեկից»,- նշեց «Պահպանողական կուսակցության» նախագահը:
«Այն կեղծ քաղաքակրթության, որի մեջ մենք հիմա կանք, և արևմտյան քաղաքակրթության առանցքային, անկյունաքարային տարբերություններից ամենաառաջինն այն է, որ արևմտյան քաղաքակրթությունը անմեղության կանխավարկածի հիմքի վրա է՝ արևմտյան քաղաքակրթությունը հարգում է անմեղության կանխավարկածը: Մենք որևէ կերպ չվստահելու իրավունք չունենք բոլոր նրանց, ովքեր կապաշխարեն (մենք ասելով՝ նկատի ունեմ սովորական քաղաքացիներիս, քավ լիցի դատավորի դերակատարում չէ, որ վերցնում եմ):
Այդպիսի մի փորձ՝ ապաշխարանքի հարթակ ստեղծելու փորձ, իհարկե, Հայաստանում եղավ 2008-ին, բայց, ցավոք սրտի, դա էլ չկայացավ: Մենք բավականին հավակնոտ ենք և անընդհատ փորձում ենք ստել, մենք կեղծիքի մեջ ենք: Դա մեզ համար գուցե էթնիկ հոգեբանություն է դարձել: Դեռևս ավելի քան 100 տարի առաջ Թումանյանը հենց այդ վերնագրով մի գործ է գրել. «Մենք անկեղծ չենք»: Այո՛, մենք անկեղծ չենք: Մարդիկ ունեն կորցնելիք, և փորձում են ցանկացած զեղծարարությամբ ու կեղծիքով հանդես գալ իրենց ունեցվածքը պահելու համար: Մեր ամբողջ քաղաքական վերնախավը որովայնամիտ է, իր ուզածը միայն նյութական ռեսուրսները պահպանելն է:
Իսկ մեր կապիտալը մեր մաքրությունն է, մենք էլ դրա վրա ենք դողում: Ինչպես Ավետարանում է ասված. «Որտեղ ձեր գանձերն են, այնտեղ ձեր հոգիներն են»:
Մեր գանձը մեր մաքրությունն է, մեր հոգին էլ այնտեղ է, դրա համար է, որ մինչև վերջ կողմնորոշված չենք, դա մի կողմից քաղաքական կարճամտություն է, մյուս կողմից՝ թեպետ կապիկի տարին ավարտվում է, բայց կապիկությունները դեռևս շարունակում են»,- նշեց Մ. Հայրապետյանը:
Հարցազրույցն ամբողջությամբ՝ տեսանյութում: