Շաբաթ առավոտյան ուժի մեջ է մտել սիրիական զորքերի և զինված խմբավորումների միջև զինադադարը Դամասկոսից արևմուտք գտնվող Վադի-Բարադա հովտում: Al Manar հեռուստակայանի հաղորդմամբ՝ կրակի դադարեցման մասին համաձայնությունը հնարավորություն կտա վերականգնել Սիրիայի մայրաքաղաքի ջրամատակարարումը:
Անցած տարվա դեկտեմբերի 24-ին «Ջեբհաթ Ֆաթհ աշ-Շամ» խմբավորման ծայրահեղականների դիվերսիայի հետևանքով Սիրիայի մայրաքաղաքը զրկվել է խմելու ջրի աղբյուրների 80%-ից: ՄԱԿ ԱԽ-ին ուղղված՝ Սիրիայի ԱԳՆ ուղերձում նշված էր, որ ահաբեկիչները ոչ միայն պայթեցրել են մայր ջրատարը, այլև այն աղտոտել են դիզելային վառելիքով:
Al Manar-ի տեղեկությամբ՝ գրոհայինները համաձայնվել են վերանորոգող խմբերին թույլ տալ հասնել Այն-էլ-Ֆիջի աղբյուրին, որտեղ գտնվում է ամենամեծ ջրային ջրամբարը, որտեղից մայրաքաղաք է հասնում խմելու ջուրը:
Համաձայնության երկրորդ փուլը ենթադրում է, որ կողմերը կբանակցեն Վադի-Բարադա հովտում ավազակախմբերի հանձնվելու պայմանների մասին:
