Դերասան Սերգեյ Դանիելյանի հիմնադրած «Քաղաքացիական ակտիվ քայլ» կուսացկությունը՝ ՔԱՔ-ը պատրաստվում է համագործակցել SOS թիմի անդամների հետ: Վերջիններս արդեն ստորագրել են համագործակցության հուշագիր:
«ՔԱՔ-ն ու SOS-ն այսօր տևական, ծավալուն բանակցություններ ունեցան: Բազմաթիվ հեռուստադիտողների խնդրանքով՝ կողմերը քննարկեցին միասնական ճակատ ստեղծելու գաղափարն ու եկան երկար սպասված համաձայնության»,- ասած է թիմի տարածած հաղորդագրության մեջ:
Նշենք, որ այն բանից հետո, ինչ ՔԱՔ-ի ղեկավար Սերգեյ Դանիելյանը հայտարարել է, որ իր կուսակցությունը մասնկացելու է ընտրություններին և ֆեյսբուք սոցիալական ցանցում բացվել է կուսակցության էջը՝ քաղաքացիների հոսքն այդ կուսակցություն չի դադարում: Ֆեյսբուքյան էջն այս պահի դրությամբ ունի մոտ 4500 հավանություն: ՔԱՔ-ի հիմնադիրներից Արման Սուլեյմանյանը «Առաջին լրատվական»-ին փոխանցեց, որ այս պահի դրությամբ կուսակցությունն ունի 1600 անդամ. «Բայց մոտ 300-ը խիստ կասկածելի է, որ իրական մարդիկ են՝ ավելի շատ ֆեյքի տպավորություն են թողնում՝ Իլհամ Ալիև անունով և այլն․․․ Առանձնապես այդ 300-ով ոգևորված չենք: Փորձում ենք պարզել՝ իրակա՞ն մարդիկ են, թե՞ պարզապես վախենում են իրենց անունով գրանցվել, թե՞ իսկապես ֆեյք են»։
SOS-ի սցենարիստ «Սմոգ»-ը «Առաջին լրատվական»-ին փոխանցեց, որ իրենք վաղուց են ունեցել կուսակցություն ստեղծելու մտադրություն, բայց որոշել են, որ առայժմ զբաղվածությունը թույլ չի տալիս. «Հետո տեսանք՝ իրենք անում են, որոշեցինք միանալ: Ընդհանուր գաղափարական հենքի վրա ենք, որոշեցինք միանալ, ինչով կարող ենք աջակցել: Ունեցել ենք հանդիպում՝ մենք մեր թիմով, Սերգեյ Դանիելյանն ու Արման Սուլեյմանյանը:»:
Այնուամենայնիվ կա մեկ հարց՝ ՔԱՔ-ն իշխանամետ է, իսկ SOS-ն իր հաղորդումներում մշտապես քննադատում է գործող իշխանություններին: Հետաքրքրվեցինք՝ արդյո՞ք դա չի խոչընդոտի իրենց գործակցությանը. «Մենք թունդ իշխանամետ չենք, իրենք թունդ իշխանամետ են: Այդ հարցում որոշ բաներ դեռ պետք է համաձայնեցնենք»,- ասաց «Սմոգ»-ը:
Մեր զրուցակիցը հավելում է՝ իրենց նպատակը խորհրդարան մտնելը չէ. «Մեր նպատակն է այս գաղափարը մաքսիմալ պրոպագանդել և առաջ տանել: Իսկ դրա արդյունքում մենք կմտնենք խորհրդարան, թե ոչ՝ երկրորդական հարց է»:
Արման Սուլեյմանյանն էլ իր հերթին հավելեց, որ վերջին համաժողովի ժամանակ իշխանամետ բառը փոխել են՝ այժմ իրենք իշխանաՀետ են. «Իշխանությունն առանց ՔԱՔ-ի ոչինչ չի կարող անել»,- եզրափակեց Արման Սուլեյմանյանը:
