Մենք անդրադարձել էինք Լոռու մարզում դպրոցի տնօրենների ընտրություններին, մասնավորապես՝ Լոռու մարզի Վանաձորի թիվ 8 և Գուգարք համայնքի թիվ 2 հիմնական դպրոցներին, որոնց տնօրենները ահազանգում են, որ Լոռու մարզպետ Արթուր Նալբանդյանը կամայական որոշումներ է կայացրել:
«Առաջին լրատվական»-ի հետ զրույցում Լոռու մարզպետ Արթուր Նալբանդյանը նշեց, որ դպրոցի տնօրեն ցմահ չեն մնում, և հերքեց իր և Գուգարք համայնքի թիվ 2 հիմնական դպրոցի տնօրենի հետ ունեցած զրույցը: «Տնօրենին այս ընթացքում չեմ հանդիպել և չեմ էլ հանդիպելու մինչև ընտրությունների ավարտը: Կընտրվի՞, շատ լավ, չի՞ ընտրվի, մեղքն իր մեջ թող փնտրի, թե ինչու դպրոցի խորհուրդն իրեն չի ուզում ընտրել կամ ինչու է ուզում ընտրել»,- ասաց մարզպետը:
Գուգարքի թիվ 2 դպրոցի տնօրեն Սամվել Մացակյանը հակադարձում է մարզպետին: «Ինձ մեծ զարմանք է պատճառում այն հանգամանքը, որ մարզպետը պատասխանել է, թե արդար դաշտ է ստեղծվել տնօրենի ընտրության համար, այսինքն՝ ժամանակավոր պաշտոնակատարը տնօրենի ընտրությանը մասնակցելու հավաստագիր չունի, 8-րդ դպրոցի տնօրենի դեպքում պատասխանում է, որ տնօրեն Կարինե Ստեփանյանին ժամանակավոր պաշտոնակատար չեն նշանակել, որովհետև ցանկացել են հավասար դաշտ ստեղծել իմ դպրոցի օրինակով, բայց բանից պարզվում է, որ 8-րդ դպրոցի տնօրենի պաշտոնակատարը հավաստագիր ունի: Հիմա ինչպե՞ս հասկանանք, ըստ օրենքի՝ տնօրենի ժամանակավոր պաշտոնակատարը պետք է չունենա հավաստագիր, իմ դեպքում այս հարցով իրենք պարզ և մաքուր են, օրենքի բոլոր կետերը պաշտպանել են, իսկ Կարինե Ստեփանյանի դեպքում խիստ անհավասար դա՞շտ են ստեղծել»,- ասաց Սամվել Մացակյանը:
Նա նշեց, որ խիստ զարմանալի և նվաստացուցիչ է նաև կրթության վարչության պետ Մինաս Սայադյանի մեկնաբանությունը խնդրի առնչությամբ. «Կրթության վարչության պետը ասում է լրատվամիջոցներին, որ որևէ իրադարձությունից տեղյակ չէ: Այդ դեպքում մեր հարգարժան ԿԳ նախարարը ինչպե՞ս է հանդուրժում մեկին, որ ոլորտին չի տիրապետում, նա կրթության ոլորտում շատ լավ տիրապետում է շուկայական հարաբերությունների տեսությանը»:
Անդրադառնալով մարզպետի հերքմանը, որ դպրոցի տնօրենին այս օրերին չի հանդիպել, որ զբաղված է և չի կարող 151 դպրոցի տնօրենների ընդունել, նշեց. «Այսինքն՝ հարգելի մարզպետը չքմեղ է, մենք՝ ստախոսներս, հերյուրանքներ ենք տարածում և փաստերը խեղաթյուրո՞ւմ ենք: Մի բան լավ գիտեմ. ավելի լավ է ապրել հպարտությամբ, քան…»,- ասաց տնօրենը՝ հավելելով՝ իսկ ինչպե՞ս է լինում, որ մարզպետը այդքան ծանրաբեռնված լինելով՝ ընտրությունների ժամանակ ոչ միայն տնօրեններին, այլև այդ նույն տնօրենների ստվերների հետ է հանդիպում գիշեր-ցերեկ:
«Ճիշտն ասած, ես ինքս ինձ դատապարտում եմ ոչ թե նրա համար, որ այդ նույն կուսակցության գաղափարների կրողն եմ եղել, ես Նժդեհի գաղափարակիցն եմ, երջանկահիշատակ Աշոտ Նավասարդյանի և Անդրանիկ Մարգարյանի, ես հպարտությամբ եմ կրել, բայց այսօր ինձ դատապարտում եմ նրա համար, որ այդ նույն կուսակցության շարքերում նման մարդկանց հետ եմ քայլում, և իմ հետագա քայլերի համար սա պատճառ կդառնա, և ես կմտածեմ՝ շարունակե՞լ նման մարդկանց հետ կուսակցության մեջ մնալ, թե՞ ոչ: Ինչ է նշանակում՝ ես ստախոս եմ, չեմ հանդիպել նրա հետ, ուղղակի զարմացնող պատճառաբանություններ են, չգիտեմ, ես հուզված եմ, չեմ կարողանում հուզմունքս թաքցնել»,- եզրափակեց տնօրենը:
Հիշեցնենք, որ Գուգարքի թիվ 2 դպրոցի տնօրենի ընտրությունը կկայանա դեկտեմբերի 27-ին: