Ղազախստանի ԱԳՆ-ում պատրաստակամություն են հայտնել առաջարկի ստացման դեպքում դիտարկել Սիրիայի կառավարության և զինված ընդդիմության հանդիպման համար հարթակի տրամադրման հնարավորությունը։ Այս մասին փոխանցում է TASS գործակալությունը։
«Եթե լինի պայմանավորվածություն Սիրիայի ապագայի հարցով բանակցությունների անցկացման համար, և եթե Ղազախստանին առաջարկ արվի ընդունելու հանդիպումը այդ երկրի կառավարության և զինված ընդդիմության միջև, մենք ուշադիր կդիտարկենք մեր պատասխանն ու ժամանակին կներկայացնենք մեր դիրքորոշումը»,-հաղորդել է Ղազախստանի արտաքին քաղաքական գերատեսչությունը։
Նախարարության ներկայացուցիչները նաև նշել են, որ Ղազախստանը հենց սկզբից կողմ է հանդես եկել Սիրիայում հակամարտության խաղաղ կարգավորմանը։
«Մենք լիովին աջակցում ենք միջազգային հանրության ջանքերին՝ ուղղված հակամարտության դադարեցմանն ու խաղաղության և կայունության վերականգնմանը»,-նշել են ԱԳՆ-ում՝ ընդգծելով, որ Աստանան ընդունել է 2015 թվականին սիրիական ընդդիմության ներկայացուցիչների բանակցությունների երկու ռաունդները։
Ավելի վաղ ՌԴ նախագահ Վլադիմիր Պուտինը հեռախոսազրույց էր ունեցել Ղազախստանի նախագահ Նուրսուլթան Նազարբաևի հետ և նրա հետ քննարկել իրավիճակը Սիրիայում։
