Հալեպի անկումը կամրապնդի Ասադի վիճակը. այժմ Մոսկվայի և Թեհրանի օգնությամբ նա վերահսկում է քաղաքային Սիրիան՝ գրում է The Times պարբերականը։ Լիբանանի հետ սահմանների մեծ մասը և Միջերկրական ծովի ափամերձ շրջանները ևս նրա իշխանության ներքո են։ Արևմտյան քաղաքականության կենտրոնական հիմնասյունը՝ Ասադին իշխանությունից հեռացնելու անհրաժեշտությունը և նրան չափավոր ընդդիմադիրներով փոխարինելը, անդառնալիորեն խարխլվել է։ Պատերազմի ընթացքը մոտենում է ավարտին, այդ պատճառով նախօրեին Հալեպի համար մարտը համեմատում են Ստալինգրադի հետ։ Ուժերի հավասարակշռությունը խարխլվում է ամբողջ տարածաշրջանում։
Հալեպում Ասադը հաղթանակն օգտագործում է, որպեսզի հարձակվի Իդլիբի վրա, որտեղ տեղափոխվել են ապստամբների մեծ մասը։ Հավանաբար Ռուսաստանը կօգնի նրան, քանի որ կարծում է, որ ապստամբները կհամագործակցեն «Ալ-Քաիդայի» հետ։
Արդյոք լավատեսության պատճառ կա՞ այս մռայլ լանդշաֆտում։ Ռազմական առանցքը, որն ապահովել է Հալեպի ոչնչացումը, շուտով կմասնատվի. չի կարելի ասել, որ Թեհրանի և Մոսկվայի ձգտումները կատարելապես համընկնում են։ Իրանը, մասնավորապես, պատրաստ է Սիրիայի տարանջատմանը, իսկ Ռուսաստանը շահագրգռված չէ դրանում։
Այս տարբերությունները պետք է օգտագործի ԱՄՆ նոր վարչակազմը։ Միացյալ Նահանգները պետք է կոշտ պատժամիջոցներ սահմանի Իրանական հեղափոխական գվարդիայի հետ կապ ունեցողների դեմ՝ կարծում է հոդվածագիրը։
Ներկայում Արևմուտքը պետք է կենտրոնանա ասադական աշխարհը կրճատելու վրա։ Մեծ Բրիտանիան նախատեսում է անօդաչու սարքել ուղարկել Հալեպ՝ հանցագործությունները տեսանկարահանելու համար, որոնք կատարում են Ասադը և նրա դաշնակիցները։ Սիրիացի առաջնորդը պետք է գիտակցի, որ ի վերջո պատասխան է տալու իր հանցագործությունների համար։ Հավանաբար նա հանգիստ քնում է Դամասկոսի իր թաքստոցում, սակայն Հաագայում նրան սպասում է բանտախուցը՝ փաստում է հոդվածագիրը։