«Իրազեկ քաղաքացիների միավորում» հասարակական կազմակերպության հրապարակած տեղեկատվության համաձայն (որը հիմնված էր Հայաստանի Հանրապետության ազգային անվտանգության ծառայության տրամադրած տեղեկատվության վրա)` Ռուսաստանի Դաշնության անվտանգության դաշնային ծառայությունը հասանելիություն ունի Հայաստանի Հանրապետության քաղաքացիների անձնական տվյալների բազային:
Հայաստանի Հանրապետության ազգային անվտանգության ծառայությունը հայտնել է, որ Ռուսաստանի Դաշնության անվտանգության դաշնային ծառայության սահմանապահ վարչությանը տրամադրվել է ՍԷԿՏ-ից օգտվելու հասանելիություն՝ ընդհանուր հղում կատարելով 1992 թվականին կնքված «Հայաստանի Հանրապետության և Ռուսաստանի Դաշնության միջև Հայաստանի տարածքում գտնվող Ռուսաստանի Դաշնության սահմանապահ զորքերի կարգավիճակի ու նրանց գործունեության պայմանների մասին» պայմանագրին՝ չնշելով դրա որևէ կոնկրետ դրույթ:
Մինչդեռ, նշված պայմանագրում որևէ կետ չկա և չի կարող լինել 2006 թվականին ստեղծված էլեկտրոնային համակարգի մասին (քանի որ, ինչպես նշվեց, այն կնքվել է 1992 թվականին):
«Բաց հասարակության հիմնադրամներ- Հայաստան» գրասենյակի գործադիր տնօրեն Լարիսա Մինասյանն «Առաջին լրատվական»- ի հետ թեմայի շուրջ զրույցում նշեց. «Այն փաստը, որ այդ տվյալները հասանելի են, անձնական տվյալների պաշտպանության իրավունքի մեծագույն խախտում է:
92թ-ի պայմանագիրը իհարկե ավելի վաղ է կնքվել, քան անձնական տվյալների պաշտպանության օրենքն է ընդունվել, և անգամ եթե հետագայում որևիցե պայմանագիր կնքվի, պետք է օրենքի ներքո զննվի, թե արդյոք այդ պայմանագիրը համապատասխանում է օրենքին: Իրավունքը պետք է պաշտպանվի, անգամ եթե օրենքը լիակատար չէ»:
Մանրամասները՝ տեսանյութում: