Երևանում այսօր տեղի ունեցավ «Հայաստանի մարզերում եվրաակումբներ» ծրագրի բացման պաշտոնական արարողությունը: Բացման խոսքով հանդես եկավ Հայաստանում Եվրոպական միության պատվիրակության ղեկավար, արտակարգ և լիազոր դեսպան Պյոտր Սվիտալսկին։ Վերջինս կարևորեց Հայաստանում նման ակումբի ստեղծումը՝ ասելով, որ ցանկալի է՝ մասնակիցներն ազատ լինեն և փորձեն ակումբի շրջանակներում կազմակերպված հանդիպումների ընթացքում ծանոթանալ Հայաստան-Եվրամիություն հարաբերությունների մանրամասներին, օրինակ՝ թե ինչպես են ընթանում բանակցությունները, երբ կավարտվեն, ի վերջո ինչ փաստաթուղթ կստորագրեն կողմերը։
«Առաջին լրատվական»-ը դեսպանից հետաքրքրվեց՝ արդյոք չկա՞ անհրաժեշտություն ուսանողական ձևաչափից դուրս հիմնել նաև այլ եվրաակումբներ, որոնք բաց կլինեն քաղաքական գործիչների, քաղաքացիական հասարակության ներկայացուցիչների համար. «Դա եվրաակումբի անդամների որոշելիքն է, թե նրանք ինչով են զբաղվելու և ովքեր են լինելու իրենց ակումբի անդամները՝ տարիքային և այլ սահմանափակումներ չկան»։
Հստակեցմանը՝ կա կարծիք ստեղծել որևէ ակումբ, որն այլընտրանք կլինի, օրինակ, հայ-ռուսական «Գրիբոյեդով ակումբին», դեսպանն արձագանքեց. «Մենք, որպես Եվրամիություն, աջակցում ենք, մենք չենք որոշում, մենք չենք առաջարկում։ Սա այլընտրանք չէ որևէ բանի, սա ազատ հարթակ է. դու կարող ես շատ հետաքրքրություններ ունենալ և շատ ընկերներ ձեռք բերել։ Ձեր խորհրդարանականները, օրինակ, միաժամանակ հայ-իսրայելական, հայ-իրանական համագործակցության խմբերի անդամ են։ Ոչ մի սխալ բան չկա, ոչ մի այլընտրանքի խնդիր չկա»։
«Հայաստանի մարզերում եվրաակումբներ» ծրագրի տնօրեն Անի Խաչատրյանը մեզ հետ զրույցում ևս ընդգծեց, որ իրենք ոչ փորձում են որևէ ակումբի մրցակից լինել, ոչ էլ որևէ մեկի դիրքորոշումը փոխել. «Լիովին առանձին հարթակ է»։