«Սահմանված կարգի խախտմամբ պարտադիր զինվորական ծառայություն չանցած քաղաքացիների մասին օրենքը ասում է, որ այն մարդիկ, որոնց 27 տարեկանը լրացել է, օրենքով մուծում են անում պետբյուջե և հետախուզումից դուրս են գալիս: Այսօր ԱԺ-ում Արամ Մանուկյանն ասաց, որ 3 զինակոչ է արդեն, կառավարությունը չի ներկայացրել ԱԺ՝ ժամկետները երկարաձգելու օրենքի նախագիծ. «Փողի վրա նստած՝ փող եք ման գալիս: Ես ասում եմ ձեզ փող վաստակելու օրենքով սահմանված ճանապարհը, ինչո՞ւ չեք անում»:
Պատգամավորն ասաց, որ շատերն սպասում են այս որոշման երկարաձգմանը, 1.5 տարի չի եղել. «Եթե կիրառելու եք, կիրառեք մինչև Նոր տարի, որովհետև կլինեն հարյուրավոր մարդիկ, որոնք Նոր տարին կարող են անցկացնել իրենց տանը»: ՊՆ նախարար Վիգեն Սարգսյանը պատասխանեց, որ որպես ՊՆ նախարար՝ կտրականապես դեմ է այսպիսի լուծմանը, որովհետև պարտադիր զինծառայությունը պետք է անցնել, ոչ թե վճարել դրա դիմաց: Որպես քաղաքացի՝ նա ասաց, որ հարգում է ժամանակին ընդունված օրենքը:
Ըստ նախարարի, այդ օրենքը դեռ ուժի մեջ է, երբ ավարտվում է, նոր դիմում են՝ կիրարկման ժամկետը երկարաձգելու հարցով: Վիգեն Սարգսյանն ասաց, որ մի քանի ամիս առաջ հերթական նիստ են արել և մի խումբ մարդիկ ստացել են այդ տարկետումը: Միջոցներն էլ չեն կազմում շատ մեծ դրամական աջակցություն՝ ռազմական խնդիրները լուծելու համար: Նախարարը խոստացավ հավելյալ ճշտել՝ օրենքի ժամկետն ավարտվե՞լ է, թե՞ ոչ:
Մանրամասները՝ տեսանյութում:
