Անդրադառնալով ընդդիմադիր դաշտում միավորումներին, «Բարգավաճ Հայաստան» կուսակցության նախկին նախագահ Գագիկ Ծառուկյանի՝ քաղաքականություն հնարավոր վերադարձին, ՀՀԿ խմբակցության ղեկավար Վահրամ Բաղդասարյանն այսօր լրագրողների հետ զրույցում ասաց, որ հենց իշխանության հորդորն է եղել, որ ընդդիմադիր դաշտում համերաշխություն լինի, որ «վերջ դրվի քաղաքական հալածանքներին, թե ով է ամենաընդդիմադիրը»:
«Դաշինքներն ու կոալիցիաները ինքնանպատակ չպիտի լինեն, դրանք գաղափարական պիտի լինեն, որ ոչ թե պահի ազդեցության խնդիր լուծեն, այլ ապագայի խնդիրներ: Իսկ Գագիկ Ծառուկյանի հետ կապված, երբ լինի վերջնական հայտարարություն, մենք կանդրադառնանք»,- ասաց Վ. Բաղդասարյանը:
Նա հավաստիացրեց, որ իրենք պատրաստ են բանակցել ցանկացած քաղաքական ուժի, այդ թվում՝ ԲՀԿ-ի հետ ընտրություններում համագործակցելու վերաբերյալ:
«Քաղաքականության մեջ չկան մշտական թշնամիներ ու բարեկամներ: Բանակցություններից որևէ մեկը վնաս չի կրում: Եթե ինչ-որ մեկի հետ խնդիրներ կամ կոնֆլիկտներ ես ունենում քաղաքական դաշտում, ի՞նչ է նշանակում, որ համագործակցության բոլոր եզրերը պետք է վառե՞լ, այրե՞լ կամուրջները: ՀՀԿ-ն իշխող կուսակցություն է, պետք է մեծահոգի լինի: ՀՀԿ-ն պարտավոր է ընդդիմադիր, արտախորհրդարանական քաղաքական ուժերի հետ քննարկել, բանակցել, եթե կան առաջարկներ»,- նշեց Վ. Բաղդասարյանը:
Անդրադառնալով դիտարկմանը, որ կարծիք կա, թե ՀՀԿ-ն է Գ. Ծառուկյանին վերադարձնում քաղաքականություն, ՀՀԿ խմբակցության ղեկավարը համարեց աբսուրդ և նշեց. «Խնդրում եմ՝ Գագիկ Ծառուկյանի ինքնուրույն կերպարի վրա ստվեր մի՛ գցեք»:
Հարցին՝ հնարավո՞ր է, որ Նախագահ Սերժ Սարգսյանը չգլխավորի ՀՀԿ-ի նախընտրական ցուցակը, Վահրամ Բաղդասարյանը պատասխանեց. «Սերժ Սարգսյանը մեր կուսակցության առաջնորդն է, և րևէ հիմք չկա, որ առաջնորդը չի գլխավորի մեր ընտրացուցակը»:
Մանրամասները՝ տեսանյութում:
