Եղնուկյանի գործով նախաքննությունն ավարտվել է, սակայն 14 հոգու գործն առանձնացվել է: Այս մասին լրագրողների հետ զրույցում ասաց Կարո Եղնուկյանի պաշտպան Տիգրան Հայրապետյանը:
«Որևէ տրամաբանություն չկա, որ Եղնուկյանը այդ 13 անձանց հետ դատաքննություն իրականացվի, որովհետև Եղնուկյանին այդ 69 հատոր գործի նյութերից, ամենաշատը վերաբերվում է 1-2 հատոր, այն էլ իր ծանոթներին՝ հարցաքննության կանչած վկաների ցուցմունքներն են: Այսինքն՝ Եղնուկյանին վերաբերվող նյութ չկա, և Եղնուկյանը ստիպված պետք է լինի տարիներով դատաքննությանը մասնակցել, այն պարագայում, որ ակնհայտ է՝ նրա կողմից որևէ գործողություն չի էլ կատարվել: Այսինքն՝ զինված խմբի անդամների հետ 1-2 զանգ ունենալ, դրանից հետո տարիներով հետևել դատավարության փուլին:
Աստված չանի, որ կալանավորումը շարունակվի, սա կնշանակի, որ Եղնուկյանին շարունակում են պատժել, և նա որևէ բան չի կատարել, սակայն գտնվում է կալանավորված վիճակում, տեսակցությունները սահմանափակված են, և ստիպված է լինելու սպանության մեջ մեղադրվող անձանց հետ միասին դատաքննության մասնակցել, ինչը մեր կարծիքով ընդհանրապես տրամաբանական չէ»,- նշեց փաստաբանը:
Տիգրան Հայրապետյանի խոքով՝ իրավաբանությունը այս գործում պակասում է, «Դուք կհամոզվեք, երբ դատաքննություն կլինի: Դատաքննության ժամանակ այնպիսի ակնհայտ ոչ իրավաբանական փաստեր ի հայտ կգան, ես հիմա չեմ ուզում առաջ գնալ ու շատ թերություններ, անգամ հանցագործության դեպքեր են տեղի ունեցել քննչական մարմինների կողմից: Եվ դա անտեսվել է, և հենց այդպես էլ նյութերը ներկայացրել են ծանոթացման:
Այսինքն՝ այդ նյութերին ծանոթանալու փուլում պարզվում է՝ շատ անօրինականություններ են տեղի ունեցել: Պարզվել է, որ Եղնուկյանի հեռախոսը ձայնալսվել է 2015 թվականի փետրվարից, այսինքն՝ դեռևս այն ժամանակ, երբ «100-ամյակն առանց ռեժիմի» շարժումը փորձել էր ինչ-որ միջոցառումներ կազմակերպել: Եվ այս մեղադրանքի մեջ դրված են նաև այդ նյութերը:
Մի խոսքով՝ շատ-շատ տարօրինակ հանգամանքներ կան: Մոտ օրերս երևի հնարավորություն կունենանք Եղնուկյանին առաջադրված մեղադրանքին ծանոթանալ, հրապարակենք Եղնուկյանին առնչվող այդ անհեթեթությունը, որպեսզի հաստատենք, որ ոչ թե իրավաբանություն չկա, այլ թույլ բանասիրություն է այստեղ:
Եթե անգամ այս մեղադրանքը մի քիչ ավելի հետազոտական ձևով նայենք, ապա կստացվի, որ մեղադրանքի բնույթը հակասում է այն ամենին, ինչ-որ ներկայացվում է մամուլով: Մեղադրանքի մեջ մոտավորապես նշված է՝ եթե Եղնուկյանը մարդկանց չտեղափոխեր գնդի տարածք, ապա հանրապետության նախագահը պետք է հրաժեշտ տար: Ստացվում է, որ քննչական մարմինները ոչ թե քրեական գործ են քննել, այլ քննել են այնպիսի գործ, որպեսզի հանրահավաքի ժամանակ քաղաքացիների թիվը մեծ չլինի և որպեսզի զինյալների պահանջները չիրականացվեն: Հասկանալի է, որ այդ ուղղությամբ է գործընթացը, բայց գոնե ձևակերպումները այդքան միամիտ ու ակնհայտ ձևով չներկայացնեն»:
Մանրմասները՝ տեսանյութում:
Լուսանկարը՝ Photolure-ի
