«Սփյուռքի հետ մինչ այժմ հարաբերություններ կառուցվել են, բայց դրանք որակական առումով լավ հարաբերություններ չեն եղել. անընդհատ ուշադրություններս սևեռած սպասել ենք, թե Սփյուռքը մեզ ինչ կտա: Դա աղքատի հոգեբանություն է: Պետք է Սփյուռքի պոտենցիալն օգտագործելու մասին մտածել: Սփյուռքի պոտենցիալը մեծ է, և չափազանց կարևոր է այն մոբիլիզացնելը, ճիշտ տեղաբաշխելը և օգտագործելը»- այս մասին «Առաջին լրատվական»-ի հետ զրույցում ասաց տնտեսագետ Վարդան Բոստանջյանը:
Տնտեսագետի խոսքով՝ հայաստանը պետք է հրաժարվի ընչաքաղց մոտեցումներից, կարողանա նպաստել, որ Սփյուռքն այստեղ ներդրումներ անի և ծրագրեր իրականացնի: «Վարչապետի զրույցը, շփումը լրագրողների և հասարակության հետ հենց այն մասին էր, որ պետք է սկիզբ դնել Հայաստան-Սփյուռք հարաբերությունների արդյունավետության բարձրացմանը, նպաստել ներդրումային ծրագրերին»:
Վարդան Բոստանջյանն ընդգծեց, որ ցանկացած ծրագրի իրականացման հիմքում անհրաժեշտ է, որ վստահություն լինի, ներդրողը վստահություն ունենա տվյալ երկրի, գործընկերը՝ գործընկերոջ նկատմամբ և այլն: Իսկ մեր երկրում, տնտեսագետի դիտարկմամբ, վստահության դեֆիցիտ գոյոթյուն ունի:
«Ցանկացած տնտեսվարող սուբյեկտ, անկախ մեր ցանկությունից, շարժվում է այնտեղ, որտեղ նպաստավոր է ներդրումներ կատարելը, եթե մեզ մոտ չեն գալիս, ուրեմն պայմանները վատն են, ոչ գրավիչ, ինչո՞ւ պետք է ռիսկի դիմեն»,- նշեց Վ. Բոստանջյանը և հույս հայտնեց, որ ի դեմս նոր վարչապետի, հնարավոր կլինի հասնել հաջողության:
Մանրամասները՝ տեսանյութում: