ԱԺ-ում այսօր 2017թ. պետական բյուջեի՝ լրամշակված նախագծի քննարկմանը ԱԺ անկախ պատգամավոր Էդմոն Մարուքյանը նշեց, որ առաջին անգամն է, որ բյուջեի նախագծի վերաբերյալ իր որևէ առաջարկ չի ընդունվել:
«Ուզում եմ իմանալ՝ պաշտպանական ծախսերի մասով ավելացում եղե՞լ է: Այս անգամ բյուջեի նախագիծը կազմելիս համագործակցություն չի եղել: Եթե առաջ կառավարությունից կապվում, ասում էին՝ կարո՞ղ է նախահաշիվ ունենաք: Այս անգամ զրո համագործակցություն: Միգուցե ի սկզբանե նպատակ չի եղել ընդունել առաջարկներս, դրա համար չի եղել համագործակցություն»:
Ֆինանսների նախարար Վարդան Արամյանը պատասխանեց, որ որքան իրենց ժամանակը հերիքել է, փորձել են կապվել պատգամավորների հետ. «Առանց կասկածի տակ դնելու պաշտպանական ոլորտի կարևորությունը, մանավանդ կիսապատերազմող երկիր ենք, իհարկե, մշտապես տեղ կա ավելացնելու այդ ծախսերը: Ձեր առաջարկը 23 մլրդ ավելացումն էր: Եթե դա անեինք, ապա անհարկի բեռ կարող էր այն լինել տնտեսվարողների վրա, իսկ դա իր հերթին նշանակում է խփել տնտեսական պոտենցիալին, իսկ մեր գերնպատակը տնտեսական աճն է… Պաշտպանական ծախսերը նույնն են մնացել»:
Էդմոն Մարուքյանը նաև հարցրեց կառավարության օպտիմալացման մասին: «Հռետորաբանության մեջ կա, բայց գործով չենք տեսնում, որ ցանկություն կա: Կառավարությունն անգամ ռիսկ չի անում փոխմարզպետներին կրճատել: Մի-երկու ԾԻԳ կրճատելով չի… Դուք ասում եք, թե գումարներ որտեղի՞ց՝ տնտեսումներից, կառավարության ուռճացված ծախսերից: Էնքան բան կա, բայց օպտիմալացում ես չեմ տեսնում, միայն հռետորաբանության մեջ է մնացել»,- նշեց պատգամավորը:
Վարդան Արամյանը չհամաձայնեց, որ կրճատումներ անելու քաջություն կառավարությունը չունի, հակառակը, հավաստիացրեց, որ «չափից ավելի ամբիցիոզ են ծախսերը կրճատում»:
Մանրամասները՝ տեսանյութում: