Apple ընկերության սմարթֆոնների վաճառքի անկումը ստիպել է ընկերության որոշ մատակարարների սկսել փնտրել նոր հեռանկարային ոլորտներ։ Այս մասին գրում է Financial Times-ը։
Երրորդ եռամսյակում iPhone-ի վաճառքի ծավալները կրճատվել են՝ անցած տարվա նույն ժամանակահատվածի համեմատ նվազելով 5 տոկոսով՝ քանակական արտահայտմամբ և մոտ 13 տոկոսով՝ գումարային արտահայտմամբ։ Դա անդրադարձել է ոչ միայն ամերիկյան ընկերության, այլև նրա գործընկերների վրա։
«Սմարթֆոնների շուկան մեծ է, տարեկան վաճառքը հասնում է 1.5 մլրդ միավորի։ Սակայն սուպերցիկլերն ավարտվում են»,-պարբերականի հետ հարցազրույցում ասել է HSBC-ի վերլուծաբան Ստիվեն Պելայոն։
Ոլորտի մասնագետները կարծում են, որ եթե սմարթֆոնների համար դետալներ մատակարարողները կենտրոնանան միայն այդ շուկայի վրա, ապա 5-10 տարի անց պարզապես կսնանկանան։