Ադրբեջանը ձախողվել է Ղարաբաղյան հարցում, ձախողել է իր դիվանագիտությունը և չի կարող հարցը լուծել նաև ռազմական ճանապարհով: Ադրբեջանի ներկայիս ռեժիմը հակապետական քաղաքականություն է իրականացնում ադրբեջանցի ժողովրդի դեմ, որի համար ապագայում կանգնելու է արդարադատության առջև և դատապարտվելու է իրենց՝ ադրբեջանցիների կողմից: «Առաջին լրատվական»-ի հետ զրույցում այսպիսի կարծիք հայտնեց Մերձավոր Արևելքի և Կովկասի հարցերի փորձագետ Ստանիսլավ Տարասովը՝ խոսելով հայ-ադրբեջանական հակամարտության շուրջ ստեղծված ընդհանուր իրավիճակի և Ադրբեջանի պահվածքի մասին:
Փորձագետի խոսքով՝ Ադրբեջանը հոգեբանորեն ծանր վիճակում է գտնվում, քանի որ պարտվել է Լեռնային Ղարաբաղում և այժմ փորձում է իր քաղաքացիներին դաստիարակել կեղծ կայսերապաշտական գաղափարներով, բայց Ադրբեջանը ո՛չ Ռուսաստան է, ո՛չ էլ Իրան կամ Թուրքիա, որոնք ունեն կայսերական…: Իրականում Ադրբեջանը անկայուն, քանդված պետություն է, որին Արևմուտքում անվանում են «անկայուն գոտի քաղաքական գոյության համար»:
«Ադրբեջանը անկայուն պետություն է, նա կորցրել է Ղարաբաղը ու ևս 7 շրջան, իրականում վերահսկողություն չունի Նախիջևանի նկատմամբ: Դա քանդված, անկայուն երկիր է: Այդ աթոռը ընդամենը երկու ոտքի վրա է կանգնած: Այսպիսին է այժմ իրավիճակը»,- հայտարարեց Տարասովը:
Մեր զրուցակցի խոսքով՝ Ադրբեջանի ցանկացած քայլ սխալ է, նրանք չեն կարողանում օգտագործել դիվանագիտության հնարքները և այժմ հայտնվել են ցայտնոտի մեջ:
«Օրինակ՝ նրանք մեկ հայտարարում են, որ դեմ են Լեռնային Ղարաբաղի ինքնավարությանը, հետո հայտարարեցին, որ պատրաստ են ինքնավար հանրապետության կարգավիճակ տալ Ղարաբաղին: Նրանք ուղղակի անտանելի են. ասում են՝ ոչ, Ղարաբաղի ժողովուրդ, հայեր ընդհանրապես չկան, հետո հանկարծ հայտարարում են, թե պատրաստ են ինքնավար հանրապետության կարգավիճակ տալ նրանց: Եթե այդպիսի էթնոս չկա, ինչպե՞ս են նրանց հանրապետության կարգավիճակ տալիս: Նրանք խճճվել են, պարտվել են դիվանագիտության մեջ:
Ռազմական գործոնը. Ադրբեջանը 27 միլիարդ դոլար է ծախսել սպառազինության վրա: Նրանք շատ լավ գիտեն, թե ում դեմ են պատրաստվում պատերազմել: Իրանի՞. երբե՛ք: Ռուսաստանի՞. ո՛չ: Ուրեմն ո՞ւմ դեմ են նրանք պատրաստվում պատերազմել. պարզ է, որ դա հակահայկական ներուժ է: Հայաստանը ՀԱՊԿ-ի, Եվրասիական միության անդամ է, այժմ ստեղծվել է միացյալ զինվորական հրամանատարություն, Հայաստանը ստացել է միասնական Հակաօդային պաշտպանության համակարգ: Այստեղից հարց է ծագում. այդ փողերը տանկերի և այլ զինատեսակների վրա ծախսելու փոխարեն՝ ադրբեջանցիները կարող էին հաշտության գալ Ղարաբաղի հայերի հետ, կարող էին 5-10 միլիարդ դոլար տալ հայերին, ասել՝ վերցրեք այս գումարը, զարգացեք, հետո համաձայնության կգանք, միգուցե որոշենք իրար հետ ապրել: Իսկ նրանք ուզում են տարածքը վերցնել առանց հայերի: Դա անիրական բան է: Ներեցեք, նրանք կատարյալ ապուշներ են:
Ի դեպ, Ադրբեջանի ներկայիս ռեժիմին ապագայում դատելու են՝ ադրբեջանական ժողովրդի դեմ այդ հակապետական քաղաքականության համար, իրենք՝ ադրբեջանցիներն են դատելու: Նրանք պարզապես հիվանդ հոգեբանության ժառանգներ են, նրանք ոչինչ չեն սովորել: Նրանք սեփականացրել են ուրիշների պատմությունը: Իրանը հիմա ոտքի է կանգնում և նոր պատմություն է գրելու իր համար: Կտեսնենք, թե ինչ տեղ կհատկացնի ադրբեջանցիներին»: