Նոյեմբերի 24-ին Մարդու իրավունքների եվրոպական դատարանը (ՄԻԵԴ) վճիռ հրապարակեց ընդդեմ Հայաստանի Հանրապետության՝ պարտավորեցնելով 50 հազար եվրո վճարել բանակում մահացած Սուրեն Մուրադյանի ընտանիքին։ Եվրոպական դատարանը գտել է, որ խախտվել է զինվորի կյանքի իրավունքը:
Սուրեն Մուրադյանի հայրը՝ Հրաչյա Մուրադյանը «Առաջին լրատվական»- ի հետ զրույցում նշեց, որ 2002թ.-ից սկսած, ինքն սկսել է պայքարել անարդար վերաբերմունքի դեմ. «ՀՀ-ում ես չգտա արդարություն, բոլորը կոծկում էին, բոլորը ստում ու ծածկում, հինգ տարի հետո՝ 2007-ին գործերն ուղարկեցի ՄԻԵԴ»: Մարդու իրավունքների եվրոպական դատարանի վճիռը Հրաչյա Մուրադյանի համար անսպասելի չէր:
Հրաչյա Մուրադյանը տեղեկացրեց, որ Հայաստանում բազմաթիվ անգամներ իրեն առաջարկել են լռել. «Այդ մասին ինձ առաջարկել են Արդարադատության նախարարությյունից, նրանք ինձ ասացին՝ արդեն եղածը եղել է, բարեկամական լուծում եկեք գտնենք, ինչքան գումարի կարիք ունեք, մենք կվճարենք: Ես պատասխանեցի, որ որևէ գումարի կարիք չունենք: Ինձ հարցրեցին, թե ինչն է իմ նպատակը, և ես ասացի, որ իմ նպատակը միայն այն է, որ այդ ստոր ոհմակը, այդ ստոր սպաները տատժվեն… Մինչև վերջին մարդասպանին չստիպեմ, որ իր պատիժը կրի, ինձ համար մխիթարություն չի լինի»:
Հրաչյա Մուրադյանի հավաստմամբ՝ Սուրեն Մուրադյանը մահացել է դաժան ծեծի հետևանքով:
Մանրամասները՝ տեսանյութում:
