Ղրղըզստանի նախագահ Ալմազբեկ Ատամբաևը հավաստիացրել է, որ ուղիղ մեկ տարի հետո կհեռանա պաշտոնից և երկրում իշխանափոխություն կլինի, հաղորդում է RIA Novosti-ն։
Աթամբաևը երկրի նախագահ է ընտրվել 2011թ․և նրա լիազորությունների ժամկետն ավարտվում է 2017թ․ վերջին։
«Ժամանակը շատ արագ է անցնում, ես բողոքելու առիթ չունեմ, Ղրղըզստանի ժողովրդի օգնությամբ շատ բան է հաջողվել անել։ Մենք այժմ լրիվ այլ երկիր ունենք։ Մեկ տարի հետո ես կհեռանամ այս աշխատանքից և երկու-երեք տարի անց ակնհայտ կլինի՝ ինչ է հաջողվել անել»,-ասել է Ատամբաևը։
Նա նշել է, որ չգիտի, թե ում կընտրի ժողովուրդը հաջորդ տարի, սակայն ամենակարևորն այն է, որ այդ մարդը «երկիրը հետ չտանի»։ Նախագահի խոսքով՝ իր համար միևնույն է, թե ով կգա իշխանության գլուխ՝ նախագահական Սոցիալ-դեմոկրատական կուսակցության, թե ընդդիմության ներկայացուցիչ, կարևորը, որ դա լինի լուրջ աշխատող կուսակցություն։
Ղրղըզստանի նախագահը կարծում է, որ լավ կլինի, եթե մինչև 2020թ․ երկրում ձևավորվի երկու ուժեղ կուսակցություն, որոնք կկարողանան փոխարինել միմյանց խորհրդարանում, ինչը թույլ չի տա մարգինալ քաղաքական գործիչներին ստանձնել իշխանության ղեկը։