«Մենք ոչ միայն այս փուլում, այլ ի սկզբանե՝ կուսակցություն ստեղծելու ժամանակ հայտարարել էինք, որ կողմնակից ենք լինելու լայն համախմբմանը և այնպիսի դաշինք ձևավորելուն, որը կդառնա լուրջ, այլընտրանքային բևեռ: Կողմ ենք ընտրություններին դաշինքով և լայն համագործակցությամբ մասնակցելուն, և երկրում փոփոխություններ իրականացնելու ելքը մենք տեսնում ենք դրա մեջ»,- «Առաջին լրատվական»- ի հետ զրույցում այս մասին ասաց ԱԺ պատգամավոր, «Համախմբում» կուսակցության փոխնախագահ Ստեփան Մարգարյանը:
Նա նշեց, որ քաղաքական ուժերի հետ խորհրդակցություններ են ընթանում, սակայն դեռևս վերջնական որոշման չեն հանգել, այդ իսկ պատճառով անուններ չեն հրապարակում: Ս. Մարգարյանի խոսքով՝ եթե դաշինք չձևավորվի, «Համախմբում»- ն ընտրություններին կմասնակցի միայնակ, իսկ թե այդ դեպքում կուսակցությունն, ինչ հնարավորություններ կունենա, դեռ վաղ է կանխատեսել:
Ս. Մարգարյանի դիտարկմամբ՝ մեր օրենսդրությունը, ընտրական գրված և չգրված կանոնները չեն նպաստում դաշինքների կայացմանը: Նրա խոսքով՝ քաղաքական կառույցների խոշորացման մասին խոսվում է, բայց գործընթացները տանում են մասնատման կամ առանձնանալուն, և խնդիրը երկրում ստեղծված խաղի կանոնների մեջ պետք է փնրտել:
«Սահմանադրությամբ և Ընտրական օրենսգրքով ամրագրվել են որոշ վտանգավոր դրույթներ, որոնցից է կայուն մեծամասնության գաղափարը, դա հետընթաց է: Ավելի քան 10 տարի է երկրում կայուն մեծամասնություն ունենք, բայց երկիրը դրանից չի զարգանում»,- նշեց Ս. Մարգարյանը:
Նրա գնահատմամբ՝ Կուսակցությունների մասին նոր օրենքով լիբերալացվում է կանոնակարգը: «Այս օրենքը չունի իր ներքին փիլիսոփայությունը՝ ուղղված քաղաքական դաշտի առողջացմանը, կարծում եմ, որ այլ օրենքներով և այլ խաղի կանոններով պետք լինի քաղաքական դաշտի առողջացումը»,- նշեց «Համախմբում» կուսակցության փոխնախագահը:
Մանրամասները՝ տեսանյութում: