«Գալուստ Սահակյանի մտքերը վերծանելն անհնար է»,-այս մասին այսօր լրագրողների հետ զրույցում ասաց ՀԱԿ խմբակցության ղեկավար Լևոն Զուրաբյանը՝ անդրադառնալով երեկ ԱԺ-ում ԱԺ նախագահ Գալուստ Սահակյանի հնչեցրած մտքերին: Գալուստ Սահակյանը Լևոն Զուրաբյանի ելույթից հետո հակադարձել էր՝ ասելով. «Դուք Լևոն Պետրոսյանին մի՛ դարձրեք ձեր հարազատը… Նա մեր ազգային ամբողջ ըմբռնումների ընթացքում եղել է, և այնպես չէ, որ Աշոտ Նավասարդյանը հատուկ գովացել է Լևոն Տեր-Պետրոսյանին: 95թ-ին մենք միասին եկել ենք ԱԺ մեկ խնդրով՝ մենք պաշտպանել ենք Ղարաբաղը, որը դուք ուզում էիք տաք…»:
«Չեմ կարծում, որ նրա խոսքը հնարավոր է հասկանալ ու ընկալել. նրա արտահայտությունը փորձեցի հասկանալ, սակայն ապարդյուն. ես միշտ սովոր եմ հակառակորդին հարգել: Փորձում եմ լրջություն փնտրել ու հասկանալ այդ խոսքերը: Մի քանի տարբերակով փորձեցի վերծանել այն, բայց չստացվեց: Համենայնդեպս ես հասկանում եմ, որ ինքը՝ Գալուստ Սահակյանը, մեր ազգային ըմբռնումների մեջ չկա, քանի որ նրա ասածներն ըմբռնել ընդհանրապես շատ դժվար է»,-ասաց Լ.Զուրաբյանը:
Նա նաև նշեց, որ չգիտի՝ Գալուստ Սահակյանի խոսքերին լո՞ւրջ վերաբերվի, թե՞ ոչ, երբ խոսքը ԼՂ հակամարտության մասին է. «Մենք տեսել ենք ՀՀԿ վարած քաղաքականությունը, տեսել ենք՝ ինչքան ավելի վատ դիրքերի վրա են հայտնվել ՀՀ և ԼՂՀ դիրքորոշումները: Հիմա չգիտեմ՝ ինչի՞ համար ենք պայքար տանում, սակայն դրանք շատ ավելի թույլ դիրքորոշումներ են, հիմա շատ ավելի վատ վիճակում է գտնվում բանակցային գործընթացը, քան գտնվում էր 1990-ականներին: Իսկ այդ տարիներին Ադրբեջանը պատրաստ էր ու արդեն համաձայնությունը տվել էր խաղաղ կարգավորման գործընթացին, քանի որ ՀՀ-ն բանակցում էր ուժեղի դիրքից: Այսօր թելադրողը Ադրբեջանն է… Հուսով եմ՝ Գալուստ Սահակյանը կհասկանա, թե ինչ ասացի»:
Ինչ վերաբերում է Լևոն Տեր-Պետրոսյանի կողմից հող հանձնելու վերաբերյալ Գ. Սահակյանի հայտարարությանը, Լևոն Զուրաբյանը այդպիսի գնահատականները աբսուրդ համարեց. «Եթե հայոց պատմության տեսանկյունից նայենք, վերջին հազարամյակում երևի առաջին անգամն է, որ ՀՀ-ն, հայերը ոչ թե հող են հանձնում, այլ հող ձեռք են բերել: Հմուտ քաղաքական գործիչներն ունեն խաղաղ բառապաշար, նրանք խոսում են խաղաղության մասին, կարգավորման մասին, իսկ ընթացքում տարածքներ են վերցնում:
Իսկ այս տիպի ազգային ըմբռնումների մեջ գտնվող գործիչների դեպքում կատարվում է լրիվ հակառակը, այսինքն՝ նման ռազմատենչ հայտարարություններ են անում անհաշտ դիրքերից, իսկ գործընթացը տանում են դեպի պարտություն ու հանձնում»:
Մանրամասները՝ տեսանյութում:
