Աշխարհում հայտնի մի շարք ընկերություններ, այդ թվում՝ Unilever-ը, Nestlé-ն և Procter&Gamble-ը, իրենց արտադրանքի մեջ օգտագործում են արմավի յուղ, որը ներկրվում է Ինդոնեզիայից։ Արմավի յուղի արտադրման համար Ինդոնեզիայում շահագործվում է երեխաների աշխատանքը, ասվում է Amnesty International միջազգային իրավապաշտպան կազմակերպության հաշվետվությունում։
«Ընկերություններն աչք են փակում աշխատանքային ուժի շահագործման վրա… և շարունակում են եկամուտներ ստանալ սարսափելի խախտումներով»,-հայտարարել է կազմակերպության հետազոտողներից մեկը։
Խոշոր կորպորացիաները, ինչպիսիք են՝ Colgate, Nestlé, Unilever, համոզում են հաճախորդներին, որ իրենց արտադրանքում օգտագործվում է բացառապես էկոլոգիապես անվտանգ արմավի յուղ, սակայն հետազոտության արդյունքները ցույց են տվել, որ դա այդպես չէ։ Էկոլոգիապես մաքուր ոչինչ չկա արմավի յուղում, որն արտադրվում է մանուկների հարկադիր աշխատանքի միջոցով, ասվում է հաշվետվությունում։