Ամերիաբանկն ու ֆրանսիական «Պրոպարկո» ընկերությունը կնքեցին 20 միլիոն ԱՄՆ դոլարի վարկային պայմանագիր։ Տրամադրված գումարը նախատեսվում է ուղղել Հայաստանում էներգաարդյունավետության, վերականգնվող էներգետիկայի , գյուղատնտեսության, սննդի վերամշակման, կրթության և առողջապահության ոլորտներում գործարարության աջակցության, տնտեսական աճի խթանման և աշխատատեղերի ստեղծման տեսանկյունից կենսական նշանակություն ունեցող ծրագրերի իրականացմանը։
«Պրոպարկո» ընկերության ֆինանսական հաստատությունների գծով ղեկավար Գիյոմ Բարբուսը այսօր լրագրողների հետ հանդիպմանը նշեց.
«Վերջին 3-4 տարիների ընթացքում ես առիթ եմ ունեցել հետևելու «Ամերիաբանկ»-ի անցած ուղուն և իրականացրած ծրագրերին և ինքս ինձ համար փաստել եմ այն առաջընթացը, որը գրանցել է «Ամերիաբանկ»-ը, մանավանդ հաշվի առնելով, վերջին երկու տարիների ընթացքում եղած որոշակի դժվարությունները»։
Սա «Ամերիաբանկ»-ի և «Պրոպարկո» ընկերության միջև կնքված երկրորդ գործարքն է։ Նշենք, որ «Պրոպարկոն» ֆրանսիական զարգացման գործակալության դուստր ձեռնարկությունն է, որն իր գործունեությունն է ծավալում մասնավոր հատվածի զարգացման ուղղությամբ։ Հայաստանում «Պրոպարկո»-ի առաջին ֆինանսական ներդրումը կատարվել է դեռևս 2013թ-ին, երբ ընկերության և «Ամերիաբանկ»-ի միջև կնքվել է 15 միլիոն դոլարի չափով վարկային պայմանագիր։ Գիյոմ Բարբրուսի խոսքերով՝ ստորագրված առաջին վարկային պայմանագիրն ավելի շատ թիրախավորված էր գյուղմթերքի արտադրության և վերամշակման ուղղությամբ, իսկ այս պայմանագիրը՝ ներառում է նաև էներգետիկ արդյունաբերության և սոցիալական ուղղվածության ծագրեր:
«Թվային բոլոր ցուցանիշները իմի բերելով՝ կարող ենք փաստել հետևյալը, որ Ամերիաբանկը իր վարած գործունեության մեջ առաջատարի դիրքն է ստանձնել և նրան հաջողվել է ֆինանսական մի կուռ համակարգ ձևավորել՝ ի շնորհիվ իր բաժնետերերի ցուցաբերած օժանդակության, ինչպես նաև գրագետ մենեջմենթի ու համապատասխան փորձառու կադրերի»,-ասաց նա։
Հայաստանում Ֆրանսիայի արտակարգ և լիազոր դեսպան Ժան-Ֆրանսուա Շարպանտիեն իր գոհունակությունը հայտնեց և նշեց, որ ուրախ է տեսնել, թե ինչպես է Հայաստանում ֆրանսիական զարգացման գործակալության դուստր ձեռնարկությունը ընդլայնում ու հզորացնում իր գործունեությունը։
«Որդեգրված այս քաղաքականությունը, որն առաջիկայում արդեն կենսագործվելու է, լիովին համահունչ է Ֆրանսիական զարգացման գործակալության որդեգրած ընդհանուր քաղաքականությանը, այսինքն կանաչ տնտեսության մշտական աճին, ինչպես նաև համահունչ է Հայաստանի իշխանությունների որդեգրած՝ վերականգնող էներգիայի աղբյուրներին, տնտեսությանն ու արդյունաբերությանը զարկ տալու քաղաքականությանը»,-ընդգծեց դեսպանը:
«Ամերիաբանկ»-իգլխավոր տնօրեն Արտակ Հանեսյանն իր հերթին կարևորեց տնտեսության զարգացման և աշխատատեղերի ստեղծման համար երկարաժամկետ և մատչելի տոկոսադրույքներով ֆինասական միջոցների ներգրավումը։ Այս համատեքստում պարոն Հանեսյանը նշեց.
«Մենք մշտապես և տևական աշխատանքներ ենք տանում, որպեսզի մեզ հետ համագործակցող միջազգային ֆինանսական կառույցներից առավել բարենպաստ պայմաններով միջոցներ ներգրավենք և մեր տնտեսության ֆինանսավորումն իրականացնենք և այս տարիների ընթացքում այդ նպատակով արդեն շուրջ 500 միլիոն դոլար վարկային ռեսուրս ենք ներգրավել տարբեր բնագավառների համար՝ սկսած գյուղատնտեսության, փոքր ու միջին բիզնեսի աջակցության, էներգետիկ ծրագրերից մինչև գյուղմթերքների արտադրություն, էներգոխնայողություն և այլն: Բարեհաջող այդ բոլորը տեղաբաշխվել են Հայաստանի տնտեսության տարբեր ոլորտներում՝ աջակցելով տնտեսավարող սուբյեկտների զարգացմանը և նոր աշխատատեղերի ստեղծմանը»։
Արտակ Հանեսյանի վստահեցմամբ՝ առաջիկա ամիսների ընթացքում ևս նախատեսված է մոտ 70 միլիոն դոլարի պայմանագրերի կնքում ինչպես Ամերիաբանկի հետ արդեն համագործակցող, այնպես էլ Հայաստանի ֆինանսական շուկա դեռևս նոր մուտք գործող միջազգային ֆինանսական կառույցների հետ։
