«Հայաստանում ձևավորվել է միակուսակցական համակարգ, որն ունի ֆինանսական և այլ տեսակի ռեսուրսներ և օրենսդրական փոփոխություններ է անում իր համար՝ և՛ Սահմանադրությունը փոխվեց, և՛ Ընտրական օրենսգիրքը, կփոխվի նաև ԱԺ կանոնակարգը, կուսակցությունների մասին օրենքն է փոխվում ևՀՀԿ կանոնակարգի փոփոխությունը պետք է դիտել այդ տրամաբանության մեջ՝ այսինքն՝ ամբողջ իշխանությունը ՀՀԿ-ին, իսկ ՀՀԿ-ի մեջ՝ իշխանությունը Սերժ Սարգսյանին»,- այս մասին «Առաջին լրատվական»- ի հետ զրույցում ասաց «Համագործակցություն հանուն ժողովրդավարության» ՀԿ ղեկավար Ստեփան Դանիելյանը:
Նրա խոսքով՝ կուսակցության կառավարող կառույցները վրևից ներքև են կառուցվում, ոչ թե ներքևից վերև, որը հակաժողովրդավարական մեխանիզմ է՝ անձի իշխանության համար. այս բոլոր փոփոխությունները այդ տրամաբանության մեջ են, այսինքն՝ ստեղծվում է «կումունիստական» կուսակցություն առանց գաղափարախոսության»:
Ստեփան Դանիելյանի դիտարկմամբ՝ անգամ տարիներ առաջ պարզ էր, որ ընտրությունների միջոցով Հայաստանում իշխանությունը չի կարող փոխվել. «Իշխանությունը կփոխվի այլ տեխնոլոգիաներով՝ հեղափոխություն, հեղաշրջում, իշխանության մեջ հեղաշրջում, հանրային ակտիվ անվստահություն, որը կարող է խաղաղ եղանակներով իրականացվել, ընտրություններին չմասնակցել և խաղաղ ակցիա կազմակերպել. այս մեխանիզմները կարող են լուրջ ազդեցություն ունենալ. կսպասենք, մինչև հասարակությունը հասունանա կամ երկրում տնտեսական կոլապս առաջանա»:
Ստեփան Դանիելյանի դիտարկմամբ՝ Հայաստանում իրական ընդդիմություն չկա. «Հանրության մեջ չկա այն գիտակցումը, որ իրենք կարող են ինչ-որ կուսակցությունների շուրջ միավորվել, որոնք գիտեն՝ ինչպես փոխել իշխանությունը և ինչ են անելու դրանից հետո»:
Ս. Դանիելյանի խոսքով՝ իրական ընդդիմության բացակայությունը վտանգավոր է առաջին հերթին իշխանության համար և այդ վտանգը ՀՀԿ-ն կզգա ընտրություններից հետո:
Մանրամասները՝ տեսանյութում:
