ԱԺ արտահերթ նիստում այսօր շարունակվում է «Կուսակցությունների մասին» օրենքի նախագծի քննարկումը: ԱԺ ՀԱԿ խմբակցության ղեկավար Լևոն Զուրաբյանն իր ելույթում անդրադարձավ ԱԺ փոխխոսնակ Հերմինե Նաղդալյանի՝ Արամ Մանուկյանի ելույթին տված գնահատականներին, ցանկացավ «կանգնել Արամ Մանուկյանի թասիբին»:
«ԱԺ նիստերը նախագահողների բոլոր իրավունքները կարգավորվում են ԱԺ կանոնակարգ օրենքի համաձայն, ըստ որի՝ իրենց ելույթներից հետո մեկնաբանություններ անելով նիստի վարողները սիստեմատիկ ու կոպտորեն խախտում են ԱԺ կանոնակարգ օրենքը:
Ով՝ ով, բայց Հերմինե Նաղդալյանը 90-ական թթ-ի վերաբերող որևէ իրողություն քննադատելու իրավունք ընդհանրապես չունի, որովհետև ես չգիտեմ որևէ այլ մարդ, որ այդ տարիներին այդքան համառորեն աջակցել, սատարել, նեցուկ է եղել Հայոց Համազգային շարժման իշխանությանը և առաջին նախագահին: Ամենահետաքրքիրն այն է, որ ՀՀՇ-ի ցուցակում նա զբաղեցրել է 222-րդ տեղը։ Եվ երբ նա հնչեցնում է կարծիք, թե ՀՀՇ այդ ժամանակ պոլի փետեր էր նշանակում, խորհուրդ եմ տալիս զգույշ լինել, որովհետև այդպես ցանկացած արտահայտություն կարող է ուղղվել ասողի դեմ»,- նշեց ՀԱԿ խմբակցության ղեկավարը:
Լ. Զուրաբյանը ՀՀԿ–ականներին կոչ արեց զգույշ խոսել ՀՀ առաջին նախագահ Լևոն Տեր-Պետրոսյանի մասին: Նրա խոսքով՝ ՀՀՇ-ի կատարած « հանցագործություններից » հետո ՀՀԿ-ն ու նրա լիդերները՝ Աշոտ Նավասարդյանը, Գալուստ Սահակյանը, սատարել են Հայոց համազգային շարժմանը:
«Աշոտ Նավասարդյանի խոսքից բերեմ մի մեջբերում, որ 1996 թ-ին իր աջակցությունը հայտեց Լևոն Տեր-Պետրոսյանին: Նավասարդյան ասաց՝ լավագույն թեկնածուն Լևոն Տեր- Պետրոսյանն է, իր գործունեության անցած շրջանում նրա կողմից իրականացվել են մեր կուսակցության այնպիսի ծրագրեր, ինչպիսիք են մեր բնօրրանը հանդիսացող տարածքների մի մասի անկախացումը, անկախության հռչակումը և բանակի ստեղծումը…: Այս խոսքերը պատկանում են Ձեր կուսակցության ստեղծող, լուսահոգի Աշոտ Նավասարդյանին»,- ասաց Լ. Զուրաբյանը:
Զուրաբյանն ընդգծեց, որ ՀՀԿ-ն իրավունք չունի քննադատել ՀՀՇ-ին և Տեր-Պետրոսյանին, այնուհետև անդրադարձավ ՀՀԿ-ի գործունեությանը:
Մանրամասները՝ տեսանյութում: